Eskuylahan gilungkab

CEBU, Philippines - Gilungkab sa wala mailhing mga tawo ang opisina sa prinsipal ug mga lawak-saringan sa Dakit Elementary School sa barangay Dakit siyudad sa Bogo niadtong Lunes sa kadlawon apan alas 7:00 sa buntag na nadiskobrihan.

Ang mga nahanaw nga butang naglangkob sa amplifier mokantidad og P2,800, 2 ka DVD player nga mokantidad og tag 3,500 ang usa, wireless microphone duha ka buok tag P3,285 ang usa ug extension wire nga P250 diin mokantidad ang tanang nahanaw nga butang og P12,475.

Matud ni PO3 Edwin Dignos, desk officer sa Bogo City Police dihang nahinabi sa Banat News subay sa ilang imbestigasyon ang maestra nga si Jocelyn Bercero,33, taga sitio Sambag barangay Guadalupe, Bogo maoy nakadiskubre sa pag-abot niini nianang buntag nga nagkatag na ang mga butang sulod sa opisina sa prinsipal.

Dihang iyang gisusi nangahanaw na ang nahisgutang mga butang iyaha dayung gi-report sa kapulisan.

Atol sa gihimong pakisusi nasuta nga giguba ang pultahan sa kasilyas ug gilungagan ang kisame nga maoy gi-agian sa mga kawatan.

Nasuta sab nga unang gilungkab ang Home Economics (H.E.) building ug gipanguha ang pliers ug gunting nga maoy gigamit pagpugos og abli sa kasilyas ug kisame.

Wa pa matagbaw ang mga suspek gipangguba pa ang bintana sa classroom sa grade-1, grade-2 ug grade-4 ug gipangkatag ang mga bangko.

Ang kapulisan padayon pa sa ilang pakisusi aron mailhan ang mga responsable sa pagpanglungkab sa buhatan sa school principal nga si Mrs. Galili Ylanan. (BANAT NEWS)