Cebu Reps. supak sa impeachment ni Corona

CEBU, Philippines - Daghan sa mga Sugboanong kongresista ang wala mopabor sa pagpa-impeach sa kongreso kang Chief Justice Renato Corona diin ang articles of impeachment nahatud na ngadto sa Senado kagahapon sa buntag.

Ang amahan ug anak nga si 2nd district congressman Pablo Garcia mitataw nga mitambung siya sa caucus ingon man ang iyang anak nga si 3rd district congressman Pablo John Garcia apan wala sila mopirma sa 188 ka mga kongresistang mitugot sa impeachment complaint batok ni chief justice Corona tungod kay giduso kini kanila nga dinalidali.

Samtang ang laing Sugboanon nga si Anad Partylist Representative Pastor “Jun” Alcover Jr, mihulagway subay sa iyang text message dinhi sa Banat News nga usa ka subo nga pinaskuhan ang maong kalambuan dili lang kang Corona kun dili apil na sa katawhang Pilipinhon.

Kini tungod kay alang kang Alcover makonsiderar kini nga kamatayun sa demokrasya sa nasud ug mahulagway usab nga kadaugan sa mga komunista.

Dugang ni Alcover pipila niya ka mga kauban sa kongreso nga iyang gikahinabi napugos og pirma pabor sa impeachment complaint bugti sa pasalig nga i-advance og release ang pork barrel sunod tuig ug uban pang pasalig nga bonus sa palasyo.

Samtang si kongresista Tomas Osmeña sa south district sa siyudad sa Sugbo nga atua karun sa Amerika alang sa iyang medical check up mipadayag sab sa iyang text message sa DyDD nga bisan og nakatambong pa siya   di gyud siya pabor sa dinalidaling pagpa-impeach kang Corona.

Matud ni Osmeña, ang impeachment usa ka sensitibong isyu nga gikinahanglang dili dali dalion ug nagkinahanglan usab og konsultasyon sa iyang mga konstituwente.

Samtang ang amahan ug anak nga Garcia mihulagway usab atol sa interview nga dili impeachable offense ang sagad sa mga isyu nga gibasehan sama sa kaso sa League of Cities sa 16 ka bag-ong siyudad nga lima ka higayong giusab usab ang desisyon sa labaw’ng hukmanan tungod kay tibuok sakop sa Korte Suprema ang nagdesisyon ug dili lang si Corona.

Ang amahan ug anak nga Garcia ingon man si Alcover kaalyado ni kanhi Presidente Gloria Arroyo samtang si Osmeña kaalyado usab ni Presidente Benigno Aquino III. (/EIM)(BANAT NEWS)