P3.4M hinabang gihatag ni Gwen sa Naga

CEBU, Philippines - Mikabat sa P3.4 milyones nga financial assistance ang gihatag ni Governor Gwendolyn Garcia ngadto sa mga opisyales sa siyudad sa Naga alang sa mga proyekto sa mga barangay sa siyudad.

 Ang mga tseke nga mibalor og tag P100,000 ug tag P200,000 gidawat   sa mga kapitan sa 17 ka barangay sa maong dakbayan didto sa Naga atol sa Governor’s Cup a Horse Show Competition South Qualifying Race   sa miaging adlaw.

Si Naga City Mayor Valdemar Chiong miingon nga gamiton ang naasoy nga kantidad alang sa pag-pangayo sa mga barangay hall, health center ug mga Day Care Center sa matag barangay.

Ang pipila sa barangay nga nakadawat og financial assistance mao   ang barangay Alpaco, Balirong, Cogon, Lanas, Langtad, Naalad, South Poblacion, Patag, Uling, West Poblacion, Inuburan, Lutac, Mayana, Mainit, North Poblacion, Tag-jaguimit ug Tuyan.

Samtang giklaro sa gobernadora nga ang maong hinabang iyang gihatag gumikan sa pagpakig-tambayayong sa mga opisyal sa barangay ilabi na sa gilusad nga anti-grafitti campaign sa gobernador.

Sa maong kampanya nahinlo ang mga kadalanan, mga pader, poste ug mga bongbong sa mga edipisyo ug kabalayan human moabag ang mga kabatan-onan sa maong dakbayan nga gipangunahan sa ilang tagsa-tagsa ka kapitan sa barangay. (BANAT NEWS)