Polis nakapusil og duha

CEBU, Philippines - Duha ang naangol human napusilan sa usa ka polis atol sa nahitabong panagrambol sa ilang grupo ug sa mga kustomer sa usa ka disco bar nga nahimutang sa barangay Mactan, dakbayan sa Lapulapu alas-2 pasado ang takna sa miaging kaadlawon.

Ang unang biktima nga napusilan sa iyang dapi-dapi mao si Bryan Godinez, 26, usa ka seaman nga taga Casili Hills Subdivision sa barangay Casili, dakbayan sa Mandaue samtang natapsingan ug nasamdan usab sa iyang ulo si Servantes Ga-a, taga sitio San Roque sa barangay Pusok sa maong dakbayan.

Ang suspetsado nga nakapusil mao si SPO1 Michael Limalima, sakop sa Lapulapu City Police Office nga nadestino sa Police Station 2 nga nagbase sa barangay Mactan sa maong dakbayan.

Si PO2 Winston Ybañez sa Homicide Section sa kapolisan sa maong dakbayan nga nahinabi sa Banat News miingon nga kauban ni Limalima ang mga higala nga nag-inom sa sulod sa usa ka disco bar sa maong dapit.

Apan tungatunga sa ilang panag-inom usa sa mga kauban ni Limalima ang nakakita og lalis sa laing kustomer tungod kay giingong giilogan kini og pares nga babaye sa laing kustomer.

Nunot sa maong panaglalis dali nga miduol si Limalima ug dihang mipaila sa iyang kaugalingon nga polis dali usab nga misibat ang duha ka tawo nga gikalalis sakay sa usa ka motorsiklo.

Matud pa human niini laing grupo usab sa mga kalalakin-ang kustomer ang kalit nga mikulata kang Limalima .

Ang duha nga gialegar nga mikulata kang Limalima mao sila si Jaime Cañete, 31, ug Dino Antonito Inoc, 40, nga taga sitio Tacan sa barangay Ibo sa maong dakbayan.

Ug tungod kay nagkarambola naman giibot ni Limalima ang iyang armas nga kalibre .45 aron unta sa pagpasalba apan giiilog kini nila ni Cañete ug Inoc ug aksidente kining miboto ug naigo ang duha ka mga biktima.

Gidala ang duha ka biktima sa Mactan Doctor Hospital samtang mitahan si Limalima sa mirespondeng mga polis sa Police Station 2 nga maoy mitubag sa maong alarma.

Samtang si Lapulapu City Police Office Director P/SSupt. Anthony Obenza mipaubos una ni SPO1 Limalima sa camp restriction samtang nag-atubang pa kini sa imbestigasyon.

Matud pa ni Obenza magdepende sa ilang imbestigasyon kung mapasakaan ba og kasong administratiba ug kriminal si Limalima. (/EIM) (BANAT NEWS)