Engkwentro sundalo tipi, 2 CAFGU patay
CEBU, Philippines - Usa ka sakop sa Philippine Army ug duha ka mga sakop sa Citizen Armed Forces Geographical Unit (CAFGU) ang nakalas atol sa engkwentro tali kanila ug mga gidudahang sakop sa New People’s Army niadtong Biyernes sa hapon diha sa sitio Igbaklag, barangay Aningalan, San Remigio, Antique.
Ang nakalas giilang sila si Corporal Absalon Labitan ug mga CAFGU nga sila si Julie Huayang, 31, ug Vevencio Mutha, 31, pulos mga residente sa maong lugar human sa kinse minutos nga sinukliay sa bala.
Matud pa nga si Labitan maoy team leader sa 12th Cadre Battalion sa 3rd Infantry Division dihang ilang gikaengkwentro ang 25 ka mga rebelde samtang sila nagpatrolya sa maong dapit.
Hinuon dako ang pagduda sa Army nga adunay nakalas ug naangol sa habig sa mga rebeldeng gipangulohan sa usa ka alyas Jojo sa Southern Front of Kilusang Rehiyon – Panay.
“There were bloodstains along the rebels’ escape route. We also received reliable reports from residents claiming that they saw bloodied individuals being carried by armed men,” matud pa sa tigpamaba sa 3ID nga si Capt. Reylan Java.
Si Colonel Jonas Sumagaysay, 3ID acting commander mipaabot na sa iyang pahasubo ngadto sa kabanay sa nakalas niyang mga sakop.
Samtang ang mayor sa San Remigio nga si Mayor Glenn Cabigunda nanawagan sa mga rebelde nga hunongon na ang pagpakigbisog kung tinuoray pa nilang gimahal ang mga taga San Remigio.
Miboluntaryo si Cabigunda nga mopatunga sa diyalogo sa mga NPA ug sa AFP aron mahunong na ang gubot sa ilang lugar. Ang amahan ug igsuon ni Cabigunda nga pulos kanhi mga mayor sa maong lungsod nga nangulo sa mga sabot-kalinaw kaniadto sa ilang lugar gipatay usab sa mga gidudahang mga sakop sa NPA niadtong 1986 ug 1987. (BANATNEWS)
- Latest
- Trending
