CEBU, Philippines - Si Representante Luis Gabriel Quisumbing sa ika-unom nga distrito mibutyag nga may bag-o nang kahimanan ang dakbayan sa Mandaue alang sa pag-ila sa mga pasyente nga may breast cancer.
Kini ang mammogram machine nga iyang gipahimutang karon sa Eversley Child Hospital and Sanitarium (ECHS) sa Jagobiao, dakbayan sa Mandaue.
Mapasalamaton si Quisumbing sa iyang higala nga atua sa Estados Unidos kinsa maoy misuporta kaniya aron makabaton siya sa maong kahimanan alang sa taga sixto distrito.
Hinuon matud pa ni Quisumbing nga dili lamang mga molupyo sa iyang distrito ang makapahimulos niini, kundi bisan ang mga molupyo sa ubang lugar sa lalawigan.
Apan matud niya nga nakabintaha ang taga sixto distrito kay makabayad lang kini og minus nga anaa ra sa P2,000 ngadto sa P3,000 kun magpa-mammogram itandi sa taga ubang lugar.
Miingon ang kongresista sa ika-unom nga distrito nga may dakong diskuwento ang taga sixto distrito tungod kay iya kining kasuportahan sa iyang kaugalingong hinabang.
Sa mga pasyente nga magpa-mammogram nga dili taga sixto distrito, mahal-mahal gyud ang mabayran niini kay ipasubay man kini sa standard nga singil sa magpa-mammogram sa ubang mga pribadong tambalanan.
Matud pa ni Quisumbing nga ang pagbutang og mammogram machine nga kahimanan sa dakbayan sa Mandaue ug ang paghatag og dakong diskuwento sa magpa-eksamin niini nga taga sixto distrito kabahin sa katumanan sa iyang panaad sa pagtabang kutob sa iyang maabot sa mga molupyo sa maong distrito. (Wen Celen)
Gwen mibubo og P2.5 M para anti-dengue
Ni Chester Abadilla
Tungod sa malampuson nga anti-dengue campaign sa kagamhanan sa lalawigan sa Sugbo si Governor Gwendolyn Garcia mipirma na sa P2.5 milliones nga budget alang sa buhatan ni provincial board member Dr. Sergio Restauro sa unang distrito alang sa mga programa sa panglawas sa iyang distrito sa sunod tuig.
Si Restauro nga maoy nangulo sa task force batok sa dengue sa probinsiya, miingon nga ang maong gahin gitagana alang sa pagpalapad sa kampanya bahin sa pagsumpo sa sakit nga dengue.
Gitug-an usab ni Restauro nga gawas sa anti-dengue campaign, ang maong gahin gamiton usab alang sa ubang mga proyekto sa iyang buhatan sama sa Medical Mission, pagpamalit og mga kahimanan alang sa mga barangay Health Center sama sa nebulizer; stethoscope; sphygmomanometer ug uban pa.
Midugang siya nga padayon usab niyang gihatagan og dakong pahat sa iyang budget sa sunod tuig nga may labot sa educational information drive sa matag barangay sa iyang distrito batok sa pakig-gubat sa dengue. (BANAT NEWS)