Lipat-lipat gang bantayan

CEBU, Philippines - Gipahimangnoan sa kapolisan ang publiko kalabot  sa pagdagsang   sa mga kawatan nga sakop sa Lipat-Lipat gang ning panahon sa Pasko kinsa mamiktima kasagaran sa mga customer sa mga dagkong department store, mall, fast food ug restaurant.

Si PO1 Milven Pelayo sa kapolisan sa Presinto 5 sa Mandaue City Police Office (MCPO) nga nahinabi sa Banat News miingon nga niadtong miaging gabii nakasikop sila og usa ka tawo nga sakop sa maong grupo nga nangawat sulod sa usa ka kan-anan sa dalan A. C. Cortes sa barangay Looc sa maong dakbayan.

Ang nadakpan mao si Jose Moron, 41, nga taga Asinan sa barangay Mantuyong kinsa mikawat sa cell phone   sa usa ka serbedora nga si Sole Ann Sanoria.

Matud pa PO1 Pelayo nga na-busy sa pag-atiman sa mga kustomer ang biktima ug gibutang ang cell phone niini sa lamesa dihang kalit kining gipunit sa suspetsado dayong dagan.

Maayo kay nakalingi ang biktima ug nakita niini ang suspetsado sa akto nga pagpunit sa iyang cell phone hinungdan nga nakasinggit kini nga “kawatan”.

Ang mga kustomer nga lalaki nga nagkaon maoy nakarespondi dayon sa maong hitabo pinaagi sa paggukod sa suspetsado.

Apan nasugatan niini ang nagpatrolyang mga polis sa Presinto 5 nga daling misikop sa maong kawatan.

Matud pa ni PO1 Pelayo nga ang maong suspek kinsa gipaslak dayon   sa prisohan usa ka sakop sa Lipat-Lipat gang sa Mandaue kansang modus operandi mao ang pagbantay nga malipat ang tawo aron makakawat sa butang niini. (BANAT NEWS)