Skills training gilusad sa Philsca

CEBU, Philippines - Ubay-ubay nga mga ginikanan ug mga batan-on nga walay trabaho ug wala magtungha nga nakapahimus sa gilusad nga Community Extension Skills program sa Philippine State College of Aeronautics (PHILSCA) sa Mactan Benito Ebuen Air Base campus, kagamhanang lokal sa lungsod sa Cordova ug sa Brgy. Day-as sa maong lungsod sa milabay’ng adlaw.

Atol sa maong kalihukan si Cordova Mayor Adelino “Addy” Sitoy nagpasalamat sa administrasyon sa PHILSCA sa paghatag niini og higayon sa mga batan-ong lalaki ug babaye sa maong lugar nga makabaton og dugang kahibalo sa natad sa panginabuhi.

 Samtang si Dr. Felix Boyles, ang Bise Presidente sa Administration and Finance sa PHILSCA mipalanog usab sa mensahe sa ilang presidente nga si Dr. Bernard Ramirez sa suporta niini ngadto kang mayor Sitoy ug kang   Kapitan Maria Suan sa barangay Day-as tungod sa pagtugot niini nga ikahatod sa mga molupyo sa maong lugar ang proyekto sa PHILSCA kansang tumong mao ang paghatag og kasayon sa katawhan ilabi na sa mga out of school youths nga makakita dayon og trabaho.

Si Dr. Rowena Navera ang Director sa Extention program sa PHILSCA mipadayag nga dako na kaayo og ikatabang ang lima ka kurso nga ilang gitanyag ngadto sa mga kabataan ug mga kababayen-an nga libre gikan sa PHILSCA.

Ang maong mga kurso naglakip sa Basic Electronics and Radio repair, Computer Literacy, Practical Electricity, Welding ug ang Noodle making nga mahuman sulod lamang sa 10 ka adlaw ug may sertipiko na sila gikan sa TESDA. 

Si kapitan Suan nagpasalamat usab sa tagdumala sa PHILSCA-MBEAB pinaagi ni Dr. Nonadel Soriano, ang Campus Director niini tungod sa pagpili sa iyang barangay isip pilot area sa tibuok lungsod sa Cordova alang sa nahisgutang skills training. Si Dr. Soriano midugang nga human sa Brgy. Day-as, laing barangay na usab ang ilang bisitahon alang sa maong community extension program sa PHILSCA.

Giestudyohan nila ang pagpatuman sa maong programa didto sa   Isla sa Pangan-an, sakop sa Isla sa Olango aron makapahimulos usab sila sa maong tanyag nga pangalagad nga libre. (BANAT NEWS)