2 nagtangkil og pistola sikop

CEBU, Philippines - Duha ka lalaki kinsa giingong nagtangkil og pistola sa ilang hawak nasikop sa polis didto sa sitio Baybay, barangay Dumlog, dakbayan sa Talisay kagahapon sa kaadlawon.

Ang mga suspetsado mao sila si Teory Cabonilla, 50, ug Albert Quijano, 41, nga pulos taga Dumlog.

Naimbargo ni PO1 Edwin Campomanes gikan kang Cabonilla ug Quijano ang duha ka kalibre .45 nga pistola nga pulos de magazine ug adunay sulod nga tag-tulo ka mga bala matag magazine.

Sayo niini usa ka nagpakabanang lungsoranon maoy mipahibawo sa Talisay City Police Station kabahin sa duha ka tawong mga armado nga nagpagimaw sa ilang mga armas sa ilang hawak.

Si Campomanes uban sa mga miyembro sa Talisay City Intelligence Bureau (TCIB) kinsa nagpatrolya sa kadalanan sa maong higayon maoy mitubag dayon sa alarma.

Pag-abot nila sa maong lugar nakita nila ang duha ka suspetsado nga nag-inom sulod sa usa ka tindahan ug klaro kaayo ang migawal nga pul-an sa ilang mga pistola  sa ilang hawak nga nakapahadlok sa nakakita niini.

Ang duha gisita dayon ni Campomanes ug gidala ngadto sa police station ug tungod kay napakyas man sila pagpakita og mga lisensya sa ilang armas ug permiso sa pagtangkil niini, diha-diha gibalhug dayon sila sa prisohan.

Kasong illegal possession of firearms maoy isang-at batok sa mga suspetsado. (WC)(BANAT NEWS)