'Kawatan' giunay og patay sa ig-agaw

CEBU, Philippines - Patay ang usa ka gipasanginlang kawatan sa ilang dapit human kini giunay pagpatay sa iyang ig-agaw samtang kini natulog pasado alas-4 kagahapon sa kaadlawon sa sitio Looc barangay Poblacion lungsod sa Argao.

Ang biktima nailhan nga si Jimboy Sabio, 32, molupyo sa nahisgutang lugar samtang ang suspetsado nga iyang 2nd degree cousin mao si Nito Ortega, 39, molupyo usab sa maong lugar.

Sa pakighinabi sa Banat News ni PO1 Brian Yosores sa Argao Police Station misaysay kini nga ang biktima gisulod sa suspetsado samtang kini natulog sa payag sa biktima.

Sumala pang Yosores naabtan pa sa mirespondeng mga polis nga nagtinga si Sabio ug nangayo og tabang hinungdan nga ila kining gidali pagdala sa Isidro Kintanar Memorial Hospital apan gibalhin usab kini sa usa sa mga tambalanan ning dakbayan.

Apan pipila ka oras ang milabay, matud pa ni Yosores nakadawat sila og text nga nagpahibalong namatay ang biktima tungod sa mga samad pinusilan sa iyang abaga, ulo ug kamot diin maoy hinungdan sa iyang kamatayon.

Ang suspek nadakpan sa gihimong hot pursuit operation sa panimalay sa igsuon niini.

Ang kapolisan nakakuha og kabhang sa kalibre .45 samtang sa ilang gihimo nga ocular inspection sa panimalay sa biktima aduna sila’y nakitang kalibre .45.

Samtang sa nakuha usab nga impormasyon ni Yosores sa pipila ka silingan sa biktima nga kini usa ka kawatan sa ilang dapit. (BANAT NEWS)