Nagproblema sa ilang mga kapikas 2 naghikog

CEBU, Philippines - Usa ka bana ug usa ka asawa ang wala na makapaabot pa sa Pasko ug nagkutlo sa ilang tagsa-tagsa ka kinabuhi sa managlahing hitabo tungod sa problema.

Usa ka Rey Labra, 54, taga barangay Maalat lungsod sa Madridejos nga baldado sa usa ka kamot ang nagpusil sa iyang ulo gamit ang usa ka kalibre .38 kagahapon sa kaadlawon.

Sa pakighinabi sa Banat News ni PO2 Carlo Mondejar, ang mga silingan sa mga Labra nakadungog og buto sa armas nga naggikan sa panimalay ni Labra hinungdan nga ilang gisusi.

Nakita nalang nila kini nga nagkadugo sulod sa iyang lawak ug wala na kini kinabuhi.

Matud pa ni Mondejar nga base sa ilang nakuha nga impormasyon nga hilabihan ang kahiubos ni Labra tungod kay gibiyaan kini sa iyang mga anak ug asawa ug gibinlan sa 12-anyos niining apo bisan og wala na kini trabaho.

Sa pakisusi sa kapolisan sa nahitabo-an nakuha nila ang kalibre .38 nga maoy gigamit sa pagpusil sa iyang kaugalingon.

Sa laing hitabo, usa ka 19-anyos nga inahan nga giingong naproblema sa iyang bana ang nagbitik og pisi sa iyang liog sulod sa ilang balay diha sa barangay Atabay sa lungsod sa Alcoy.

Si Airee Amigo, 19, matud pa ni PO1 Abraham Quijano sa Alcoy Police Station nga nahinabi sa Banat News naguol tungod kay tagdugay nang mouli ang iyang kapuyo nga si Mark Anthony Nefil tungod usab sa bisyo niini. (BANAT NEWS)