Illegal fishing mahunong kun...

CEBU, Philippines - Makapawagtang sa illegal fishing sa kadagatan sa Cordova kun mahinayon ang katukoran sa airport sa maong lungsod sumala pa ni Mayor Adelino “Addy” Sitoy.

Si Sitoy atol sa gipahigayong Community Extension program sa Philippine State College of Aeronautics sa barangay Day-as lungsod sa Cordova miingon nga kanunay ang enkwentro sa mga sakop sa Bantay Dagat sa Cordova ug sa mga illegal nga mananagat.

Kini sagad nahitabo diha sa 1000 ka ektaryang luna nga maoy giplanuhang butangan sa tugpahanan. Migawas sa mga balitang ang Mactan Cebu International Airport dili na haom sa kasamtangang gibutangan niini diha sa Lapulapu City.

Daghan na usab mitumaw nga mga kompanyang interesadong mopalit sa luna nga biyaan unya sa MCIA sa tuyo nga butangan kini og nagkadaiyang patigayon.

Ang lakang nga ibalhin ang tugpahanan sa Cordova gituohan sa mayor nga maoy usa sa paagi nga mawagtang na ang ilegal nga panagat sa maong dapit. Dako usab kini og ikatabang unya sa ekonomiya sa maong lungsod kung mahinayon ang maong plano ilabi na kay daghang mga Cordovahanon ang makatrabaho sa maong proyekto.

 Nanghinaut si Mayor Sitoy nga matuman ang maong proyekto aron matuman usab ang planong proyekto nga pagtukod og taytayan nga magsumpay sa dakbayan sa Sugbu, Cordova ug ngadto na sa lalawigan sa Bohol. (BANAT NEWS)