Tinun-an gipusil sa tulisan

CEBU, Philippines - Anaa karon sa talandugong kahimtang ang usa ka tinun-ang babaye nga gipusil sa duha ka esnatser nga nagsakay og motorsiklo dihang nagdumili kini sa paghatag sa iyang shoulder bag alas-10 pasado ang takna sa miaging tungang gabii sa barangay Babag I, dakbayan sa Lapulapu.

Ang biktima mao si Mariel Grace Brencia Cabajes, 21, dalaga ug tinun-an sa kursong Hotel and Restaurant Management sa usa ka unibersidad sa dakbayan sa Pagadian apan nagpaubos sa iyang on the job training (OJT) sa Crown Regency sa barangay Pusok, dakbayan sa Lapulapu.

Si PO2 Noel Baredo sa Theft and Robbery Section (TRS) sa Lapulapu City Police Office (LLCPO) nga nahinabi sa Banat News miingon nga naglakaw ang biktima paingon sa pagpauli sa boarding house niini sa barangay Babag I gikan sa Crown Regency dihang kalit kining gihunongan og motorsiklo.

Duha ka wala hiilhing lalaki ang nagsakay niini ug ang nag-angkas mikanaog ug mition og armas ngadto sa biktima dungan sa pagdeklarar og tulis.

Matud pa ni Baredo nga gibunlot sa nag-angkas ang shoulder bag sa biktima apan nagdumili kini paghatag niini nga gikasuko sa usa sa mga tulisan ug midiretso og pusil sa dughan sa dalaga.

Si Baredo miingon nga human sa maong pagpusil dali nga mipabulhot sa pagpadagan sa motorsiklo ang duha ka tulisan dala ang shoulder bag sa biktima. Giingong aduna kini P6,000 nga cash, cellphone ug uban pang importanteng butang sa dalaga.

Ang biktima nga nasamdan midangop sa kabalayan sa maong lugar ug mao nay mitabang kaniya pagdala sa Lapulapu City Hospital apan human sa pasiunang pagtambal dali usab kining gibalhin ngadto sa Vicente Sotto Memorial Medical Center sa dakbayan sa Sugbo. (EIM)(BANAT NEWS)