Panginabuhian sa mga basurero sa Inayawan

CEBU, Philippines - Giklaro ni Mayor Michael Rama nga dunay livelihood programs ang ilang himoon alang sa mga scavengers nga naapektohan human sirad-i ang Inayawan sanitary landfill sa miaging adlaw.

Sumala pa ni Rama nga ang maong programa gitun-an na nila ni Konsehal Eduardo Rama ug Konsehal Nida Cabrera kinsa parehong mga sakop sa Solid Waste Management Board sa siyudad sa Sugbo.

Nasayran nga moabot ngadto sa 600 scavengers ang nanginabuhi sa maong landfill ug nangaguol karon gumikan kay nawala na ang tinubdan sa ilang kinitaan.

Ang mga mamasurahay misugyot na sa kagamhanan sa siyudad sa Sugbo nga maghimo og usa ka programa nga sila maoy mangolekta og basura sa matag balay ug ning paagiha makakuha sila og ma-recycle nga iglalabay.             

“Masaligon mi nga tabangan mi sa City government kay dili gyud lalim ang among kahimtang.

Nagsalig raman gud mi sa basura, unya luoy kaayo palandongon nga mawad-an mi og    income,” matud pa sa usa ka scavenger nga dili buot magpaila.

Matud pa sa maong scavenger nga nindot kaayo nga ideya nga i-cluster ang mga scavengers aron mao kini ang manuroy ngadto sa nagkadaiyang barangay sa pagkuha og basura nga mahimo pa nga ma-recycle. (BANATNEWS)