Nagbitbit pa sa kinawat dihang gipusil

CEBU, Philippines - Way swerte ang usa ka gidudahang notadong kawatan nga taga lungsod sa Carmen human masakpi ug gipusil samtang nanghakot sa mga butang nga iyang kinuha diha sa barangay Cogon Cross sa dakbayan sa Danao kagahapon sa ala 1:00 sa kaadlawon.

Ang biktima nga gidudahang kawatan mao si Narsales Lumpas, 33, taga barangay Baring sa lungsod sa Carmen samtang duha ka mga wala mailhing lalaki ang gitumbok nga mipusil niini.

Matud ni SPO2 Ildefonso Prosia, desk officer sa Danao City Police Station dihang nahinabi sa Banat News diha na unta sa dalan   si Lumpas nga namungingi sa gidalang sa electric fan ug nagkalainlaing mga senina ug panapton.

Apan pag-abot niini sa barangay road gisugat kini sa duha ka mga lalaki ug gipusil makadaghang higayun apan abtik nga nakadagan samtang nagbutobuto ang armas.

Si Lumpas naigo wala ug tuong batiis hinungdan sa pagkalup-og niini ug wala na makadagan pa ug pagkahuman gibiyaan sa mga namusil. Ang mga polis na nga miresponde maoy nakatabang kang Lumpas pagdala kanila sa tambalanan ug nakuha diha sa crime scene ang mga butang nga gituohang iyang kinawat.

Ang biktima nipasangil hinuon nga ang tag-iya sa maong mga butang iyang higala nga si Arjie Tabla ug usa ka giila lang niining ‘Amang’ nga nagpaabot kaniya sa unahan apan dihang gisusi sa mga polis wala na didto.

Dugang na recover sa kapulisan sa crime scene mao ang unom ka kabhang sa bala sa kalibre .45 nga gituohang gikan sa armas sa mga namusil.

Daghang mga molupyo sa maong lugar ang mipasangil nga notadong kawatan sa ilang lugar ang biktima ug sagad moatake panahon sa gabii apan giklaro sa kapulisan nga walay record sa ilang buhatan ang biktima gawas sa daghang pasangil sa mga molupyo sa maong lugar.(/EIM) (BANATNEWS)