CEBU, Philippines - Si Bise Mayor Alan Bucao sa dakbayan sa Talisay nagplanong mopasaka og kaso batok sa nagsugo sa tanod nga nagmaneho sa motorsiklo sa barangay nga wala’y lisensiya.
Kini nunot sa nahitabong aksidente niadtong Sabado didto sa sitio San Rafael, barangay San Roque, sa maong dakbayan diin namatay ang nahisgutang tanod nga si Reynante Antik Rabaya, ug naangol usab si Christian Alan Bucao, ang anak ni bise mayor Bucao niadtong Lunes sa kaadlawon.
Si Rabaya namatay human sa duha ka adlaw sulod sa tambalanan gumikan sa pagkapantok sa ulo niini sa karsada human ang motorsiklong iyang gisakyan midasmag sa motorsiklong gisakyan ni Bucao.
Si Bucao napantok ang ulo sa karsada apan tungod kay may helmet kini wala madaot ang ulo lahi kang Rabaya nga walay helmet.
Si Rabaya nga migamit sa motorsiklo sa barangay bisan walay driver’s license giingong miresponde og alarma sa sitio San Rafael diin siya madisgrasya.
Kini samtang nagpadagan siya sa motorsiklo nga nakig-abrasa kang Bucao sa susamang direksyon paatubang sa dakbayan sa Sugbo dihang mikalit siya og liko sa wala ug midasmag sa motorsiklong gimaneho ni Bucao.
Si bise mayor Bucao mibutyag nga ang iyang mga abogado miaghat kaniya sa pagpasaka og kaso batok sa mga opisyal sa barangay gumikan sa giingong negligence o kadanghag niini, apan matud niya nga dili siya buot masilo ang ilang maayong relasyon sa kapitan nga si Jun Cabrera.
Matud ni Bucao nga gitun-an pa nila ang mga posibleng lakang nga ilang himuon kung si Kagawad Rafael Chan angayan bang basulon sa aksidente basin usab wala masayud ang naulahi nga wala’y lisensya si Rabaya.
Sa laing bahin, si Bucao nasagmuyo sa mga report nga giingong adunay nahitabong whitewashing sa nahisgutang aksidente.
Gipasabot ni Bucao nga ang iyang anak ug si Rabaya parehong nalandig sa tambalanan hinungdan nga ang kapolisan sa traffic division wala dayon makakuha og detalye sa hitabo.
Si Bucao mibahad nga depensahan niya ang iyang anak kung ugaling ibalhog kini sa karsel tungod kay alang kaniya ang iyang anak maoy biktima sa hitabo.
“I am willing to surrender my career just to protect the future of my son,” ni Bucao pa.
Dugang niya nga kung ang iyang anak adunay nahimong kalapasan siya na ang mosurender niini ngadto sa mga otoridad. (/WC) (BANATNEWS)