CEBU, Philippines - Usa ka bayot nga naghubo na og karsones ang napalgang walay kinabuhi nga napuno og bun-og ang nawong ug gituohang gilugos pasado alas-3 sa miaging hapon sa sitio Olibo barangay Buhisan ning dakbayan.
Ang biktima nailhan nga si Felix Alcalde Jr. alyas Luningning, 23 ug molupyo sa sitio Anahaw sa nahisgutang barangay napalgan sa usa ka 16-anyos nga batang nanguha og kahoy diha sa kakahuyan.
Matud pa sa kapolisan hubo na sa iyang sinina, nawalis na ang bra niini ug ang karsones niini anaa na sa ubos nga bahin.
Base sa nakuha nga impormasyon sa kapolisan gikan sa higala sa biktima nga si Eulogio Bacarisa , usa usab ka bayot, mibutyag kini nga silang duha sa biktima nagkuyog nga mitambong sa usa ka birthday party sa usa sa ilang mga higala sa maong dapit ug nag-inom.
Apan dihang nangahubog na sila, si Bacarisa miuna og uli ug gibiyaan nila ang biktima nga nag-videoke uban sa mga batan-ong lalaki. Pagduda sa kapolisan nga ang biktima gilugos o gipahimuslan una kini gipatay tungod usab kay wala naman kini sapot.
Ang patay’ng lawas sa biktima ipaubos sa awtopsiya aron makita og unsay hinungdan sa kamatayon niini ug gikatakdang imbitahon ang mga batan-ong kainom niini.
Ang kapolisan nakakuha usab og usa ka kahoy nga gituohang maoy gigamit sa pagbunal sa biktima. (/EIM) (BANATNEWS)