Tulisan napriso human manulis

CEBU, Philippines - Usa sa suspetsadong tulisan kinsa nailhan sa gibiktima niini nasikop sa kapolisan didto sa sitio San Antonio, barangay Linao, dakbayan sa Talisay sa miaging Huwebes sa gabii.

Ang suspetsado nailhan nga si Joel Navasquez, hingkod, nga taga San Antonio, Linao.

Ang iyang gibiktima nga maoy mipapriso kaniya mao si Juliet Asenjo, 30, taga barangay Upper Linao, lungsod sa Minglanilla .

Si Ins. Rio Hugo Ipong sa pakighinabi sa Banat News kagahapon nagkanayon nga si Asenjo gikan pa sa barangay hall sa Linao diin siya misumbong nga gitulis siya og duha ka nagmotorsiklong lalaki duol sa barangay hall sa maong higayon.

Dihang nakita niya ang maong mga tulisan paingon na siyang mopauli sa ila, mibalik siya sa barangay hall ug gipadakop niya  kini sa barangay tanod.

Apan ang nagmaneho sa motorsiklo dali kaayong nakasibat ug si Navasquez ray naposasan ug gihatod dayon kini ngadto sa police station sa lungsod diin siya    mikagulkol karon sa prisohan. (/WC)  (BANATNEWS)