2 balot vendors gipamusil 1 patay

CEBU, Philippines - Patay ang usa ka balot vendor samtang kritikal ang laing usa dihang gipamusil samtang naninda og ballot gawas sa diskohan sa suspek nga gituohang nasuko tungod kay gibalibaran dihang nangayo kanila og balot sa sitio Imaculada sa barangay Nangka lungsod sa Balamban kagahapon sa kaadlawon.

Ang biktima nga patay dihadiha mao si Dominador Quiamco, 58, taga Bato siyudad sa Toledo samtang ang kauban niining talandugon ang kahimtang mao si Ricardo Briones Pinili, 59, taga Sangi, Toledo City.

Ang suspek mao si Eliseo Tero Maglasang alyas Edyong, nagpuyo sa maong lugar.

Matud ni SPO1 Julius Obanana, desk officer sa Balamban Police dihang nahinabi sa Banat News nagpungko sa gawas sa diskohan ang mga biktima nga namaligya og balot dihang kalit giduol ug gipamusil sa suspek.

Patay diha dayon si Quiamco samtang si Pinili gihatod sa Balamban District Hospital apan tungod kay grabe ang samad niini gibalhin kini sa tambalanan dinhi sa dakbayan sa Sugbo.

Matud ni Obanana base sa pasiunang imbestigasyon giingong nasuko sa mga biktima ang suspek tungod kay wala hatagi og balot.

Ang suspek padayon pang gipangita sa kapolisan. (BANATNEWS)