Pagdala'g armas sa sinulog idili

CEBU, Philippines - Morekomendar ang kapulisan sa dakbayan sa Sugbu ngadto sa Campo Crame nga suspensuhon ang Permit To Carry (PTC) Firearms Outside Residence dinhi sa dakbayan atol unya sa Sinulog sunod buwan.

Si Sr. Supt. Melvin Ramon Buenafe, hepe sa Cebu City Police Office (CCPO) nagkanayon nga nagpadala na siya og letter request ngadto sa buhatan sa Firearms Explosives Security Agency and Guards Supervisory Section (FESAGSS)-7.

Ang FESAGSS mao nay mopadala sa request ni Buenafe ngadto sa Campo Crame.

Nasayran nga ang pagsuspenso sa PTC gi-implementar na sa miaging sinulog dinhi sa dakbayan.

Kun pananglitan aprobahan sa Campo Crame, si Buenafe nagkanayon nga mas layo ang posibilidad nga may mga dagkong krimeng mahitabo sanglit maglikay man ang dunay mga armas nga magdala niini.

Buot sa CCPO nga sugod sa Enero 5 hangtud sa petsa 25 ang maong suspensyon sa PTCFOR.

 Sa iyang bahin si Supt. Rex Derilo, hepe sa FESAGSS-7 miingon nga si PNP Chief Nicanor Bartolome mao nay mag-igo niini.

Sayo niini, si PRO-7 director Marcelo Garbo mihangop dayon sa tinguha sa kapulisan sa dakbayan apan kinahanglan pa kining aprobahan sa Campo Crame.

Ang CCPO mohingusog usab sa ilang saturation drives sa pipila ka mga barangay dinhi sa dakbayan batok sa mga dautang elemento. (BANATNEWS)