OFW sa China gi-lethal injection

CEBU, Philippines - Gihinayon gyud sa China ang pagbitay sa overseas Filipino worker nga gikombikto niini sa kasong drug trafficking kagahapon bisan paman sa apelar sa gobiyerno sa Pilipinas pinangulohan ni Presidente Benigno Aquino III.

Pipila ka oras sa wala pa ang pagbitay gitugotang makaestorya sa 35-anyos nga OFW ang iyang mga kabanay nga naglakip sa iyang mga igsuon ug duha ka ig-agaw nga gitugotang makabiyahe sa Guangxi province, matud pa ni Bise Presidente Jejomar Binay.

Human niini ang OFW gidala sa korte diin gibasa ang iyang sentensiya ug gidiretso pagdala sa death chamber sa Liuzhou, duha ka oras nga biyahe gikan sa maong prisohan ug didto gi- lethal injection, matud pang Binay.

"The subject was very calm, but his family was crying," sumala pang Binay. "At 12:30 (p.m.) our countryman was executed."

Ang maong OFW kansang pangalan wala ibutyag nadakpan niadtong tuig 2008 sa Guilin International Airport human kini nakuhaan og 3.3 pounds (1.5 kilo) nga heroin gikan sa Malaysia.

Matud pa nga ang pagpalusot og kapin 1.76 ounces (50 grams) nga heroin ug uban pang ilegal nga drugas sa China adunay silot kamatayon sa maong nasud.

Ang Chinese Foreign Ministry spokesman nga si Hong Lei mipasalig nga pinasubay SA balaod ang gihimo sa China ug adunay koordinasyon ang duha ka nasud kalabot niini.

Ang Pilipinas walay death penalty samtang ang China maoy nag-unang nasud sa kalibutan nga adunay silot kamatayon, sumala pa sa San Francisco-based nga Dui Hua Foundation 5,000 ka tawo ang gibitay sa China niadtong 2009.

Niadtong Marso, tulo ka OFW gihapon ang gibitay sa China tungod gihapon sa susamang kaso. (AP/EIM) (BANAT NEWS)