Drayber sa minibus gibirahan

CEBU, Philippines - Naglumba og pangambak ang mga pasahero sa usa ka minibus dihang kalit gipusil ang ilang drayber sa usa sa duha ka mga tawong nagmotorsiklo sayo kagahapon sa buntag diha sa sitio Awayan barangay Poblacion 3 sa dakbayan sa Carcar.

Si Lito Fernandez Arsola, 49, taga barangay Papan lungsod sa Sibonga ug driver sa Minibus nga Allowie Express Bus nga nagbiyahian Sibonga-Cebu patay dihadiha tungod sa upat ka samad pinusilan, duha sa walang bahin sa iyang apapangig ug duha sa ulo. Ang duha ka mamumuno nga nagsakay og motorsiklong kolor pula nagsul-ob og close-type helmet. Ug ang backrider nga maoy mipusil sa biktima nagsul-ob og jacket nga kolor pula, gibana-banang may gitas-on 5 kapin ug nagpangidaron 20 pataas.

Si PO3 Vicente Garces sa Carcar Police station nga gikahinabi sa Banat News sa telepono kagahapon nagkanayon nga gikan sa Sibonga ang minibus ug paingon dinhi sa dakbayan sa Sugbu ug pag-abot sa eskina sa Awayan mihunong kini kay mo pick-up og pasahero.

Dunay saksi nga usa ka tomboy ug tanod sa maong lugar mitug-an sa kapulisan nga nagpaabot nang daan ang duha ka mamumuno nga nagsul-ob og helmet.

Pag-abot sa biktima mipaandar ang drayber sa motorsiklo ug mipidpid sa minibus ug nihunong duol sa drayber dayon mikanaog ang backrider ug giduol ang biktima dayong gidul-itan pagpusil makaupat ka higayon.

Human sa hitabo ang duha ka mamumuno daling mipasirit sa motorsiklo paingon sa sentro sa barangay Liboron.

Narekober sa miresponding kapulisan ang tulo ka kabhang sa .45 nga kalibre sa armas ug usa ka slug sa frontseat.

Si Edmund Cabahug, 50, taga barangay Putat lungsod sa Tuburan ug konduktor sa biktima nga nahinabi sa Banat News mitug-an nga diha siya sa pultahan dihang mihunong ang iyang driver aron mo pick-up og pasahero.

“Nilili ko ug nilipot sa luyo kay gatuo man ko og pasahero iyang gihunongan, butobuto naman dayon..gatuo gani ko og pabuto (firecracker) lang pero pagtan-aw nako nituay naman ang ulo, patay jud,” asoy pang Cabahug.

Matud niya tulo pa ka semana nga nag drive sa maong bus ang biktima kay gikan kining nag drive sa Canoneo Bus kaniadto. (BANAT NEWS)