P3 mil madawat sa senior karon

CEBU, Philippines - Gitakdang madawat na sa matag Senior Citizen (SC) ning dakbayan sa Sugbo ang P3,000 karong adlawa gikan sa kagamhanan ning dakbayan sa Sugbo.

Ang pagpanghatag niini himoon sa matag assembly area sa SC sa ilang tagsa-tagsa ka barangay.

Tungod kay gituohang   maghuot ang matag lugar nga tigomanan sa mga SC sa matag barangay, daan nang giawhag ni Mayor Michael Rama ang mga opisyal sa 80 ka barangay nga pabutangan og kompletong lingkoranan ang matag tigomanan sa SC.

Kasagaran nilang pundokanan sa panahong manghatag na ang kagamhanan sa financial assistane sa SC mao ang mga barangay sports complex.

Apan labaw sa tanan gitugon sa mayor nga pasuportahan sa mga opisyal sa matag barangay ang maong kalihokan, gikan sa kapitan, mga konsehales ug mga tanod aron malinawon ang pagdawat sa mga SC sa hinabang kanila.

Nasayud ang mayor nga may mga SC nga luya na kaayo busa hatagan kini og unang pagtagad sa mga opisyal sa barangay uban sa taga DSWD nga maoy gipiyalan sa pagpang-apod-apod sa maong hinabang pinansyal.  - BANAT NEWS