Byron gibaharang ikiha sa Filinvest

CEBU, Philippines - Si kanhi Capitol consultant Byron Garcia gibaharan nga pasakaan og kaso sa tagdumala sa Filinvest Land Inc. tungod sa pagsikop niini sa maintenance plumber sa maong kompaniya kagahapon sa kadlawon kinsa giingong mipawong sa main line sa linya sa tubig sa Corona del Mar Subdivision sa barangay Pooc, dakbayan sa Talisay.

Gawas kang Byron kinsa igsoon ni Governor Gwendolyn Garcia, ilakip usab sa Filinvest pagkiha ang mga polis kinsa mipriso kang Michael Almanzor, 27, ang plumber nga taga Psalm Base, barangay Poblacion, dakbayan sa Talisay nga gitugyan kanila ni Byron. Apan si Byron kinsa di magpalupig mihiwasa sa kasuko ug mibawos og bahad nga mopasaka usab siya og kaso batok kang Almanzor tungod sa pagterorismo niini sa tubig sa iyang subdivision nga gipuy-an.

Ang Filinvest maoy developer sa Coronal del Mar Subdivision nga gipuy-an ni Garcia ug gani siya maoy presidente sa homeowner’s association niini.

Matud pa ni Garcia sa mga tigbalita nga iyang gisikop si Almanzor human siya makadawat og reklamo gikan sa iyang mga silingan nga matud pa pagngon ni Almanzor ang supply sa ilang tubig   gikan sa alas 12:00 sa tungang gabii hangtud sa alas 5:00 sa buntag.

Gumikan niini nag-antos ang mga 300 ka molupyo sa maong subdivision sa maong suliran, matud pa ni Garcia.

Busa dihang sa pagpanuop niya nasakpan niya nga si Almanzor diay maoy tigpawong gumikan sa mando sa taga Filinvest, iya kining gisikop pinaagi sa citizen’s arrest ug gitugyan niya kini sa kapolisan, sumala ni Garcia.

Apan nakapanga-tarungan ang taga Filinvest nga matud pa gipahibawo na kuno nilang daan ang mga molupyo kalabot sa maong pagpawong nila sa tubig sa nahisgutang oras tungod kay giayo nila ang tubo nga may hungaw sulod sa subdivision ug gituyo nila ang maong oras diin ang mga molupyo mangatulog pa busa wala nay mogamit og tubig.

Apan matud ni Byron nga ang memorandum kalabot niini nga gipadala sa Filinvest ngadto sa mga molupyo walay pirma. Matud usab ni Garcia nga usa sa mga homeowners kansang anak nagkalibanga ug walay magamit nga tubig nga ikahugas sa hugaw siyay nakasab-an   ug gikwestiyon nganong wala siya’y gihimong action sa maong problema nga siya man untay presidente sa homeowner’.

Si Manlalaban Dante Ramos sa habig sa Filinvest nagkanayon nga ilegal ang pagsikop ni Byron kang Almanzor ug naupos na ang ilang pasensya sa igsuon sa gobernador busa ila kining pasakaan og kaso aron kini kasilotan.  - BANAT NEWS