65 ka stall sa pabuto gitugot sa SRP

CEBU, Philippines - Ang kagamhanan sa siyudad sa Sugbo makatugot lang og 65 ka mga vendor sa mga pabuto sa South Road Properties gumikan kay gilimitihan nila ang lugar nga kapanindahan niini aron masiguro ang tukmang gilay-on sa matag stall.

Ang rehistrasyon gitak-opan na niadtong Biyernes ug gipadayag ni Market Administrator Racquel Arce nga dili na sila puwede nga makadugang pa og mga vendor gumikan kay gipaniguro sa iyang buhatan nga dili maghuot ang mga mamaligyaay ning peligrong mga butang.

Ang matag stall kon lamesa sa 65 ka vendor kinahanglang may distansya nga 6 ngadto sa 7 metros aron kalikayan ang pagsikit niini.

Nagkanayon si Arce nga may maka-standby usab nga firetruck sa maong lugar ug dili usab puwede nga manigarilyo sa palibot niini.

Ang pagpamaligya og pabuto kabahin lang sa programa nga Kasadya sa SRP nga buksan karong Disyembre 14. Sa milabay nga mga tuig, ang siyudad sa Sugbo migahin og laing luna alang sa mga vendor nga namaligya og pagkaon, sinena ug uban pa.

Ang engineering department sa siyudad mao usab ang gitahasan nga mosuta nga luwas sa carnival aron masiguro nga luwas ang mga coaster ug uban pa.

Usa usab sa ilang giplanohan karon mao ang posibilidad nga butangan og koneksyon sa wi-fi ang maong dapit alang sa mga tawo nga magdala og laptop o cell       phone.

Nagkanayon si Arce nga modestino usab sila og mga polis sa maong lugar aron masiguro ang kalinaw sa maong    dapit ilabi na nga gituohan nga dagsaan kini sa mga tawo gumikan kay aduna sila’y giandam nga mga kalingawan matag gabii nga langkoban sa mga banda, mga performer gikan sa mga unibersidad ug pribadong kompanya.  - BANAT NEWS