Mga opisyal sa trapiko imbestigahon

CEBU, Philippines - Duha ka mga opisyal sa departamento sa trapiko sa dakbayan sa Talisay imbistigahonon gumikan sa kapakyas nila pagtala sa blotter sa mga detalye sa usa ka vehicular accident nga mikutlo og kinabuhi sa usa ka barangay tanod   ug miangol usab sa anak sa bise mayor sa Talisay didto sa sitio San Rafael, barangay San Roque, sa maong dakbayan   niadtong Sabado sa gabii.

Si Supt. Eddie Recamara, hepe sa Talisay City Police Station miila sa nakalas nga si Reynante Rabaya, usa ka barangay tanod, samtang ang naangol mao si Christian Alan Bucao, anak ni Bise Mayor Alan Bucao.

Ang namatyan ni Rabaya mao ang pagkapantok sa ulo niini sa sementadong karsada gumikan kay walay helmet, samtang si Bucao wala ma-grabehi tungod sa pagsul-ob niini og helmet.

Sa imbistigasyon nga gihimo ni PO2 Henry Diano nasayran nga si Bucao maoy nagmaneho sa motorsiklo nga Honda nga may plakang 4978GP, samtang si Rabaya nagmaneho usab sa motorsiklo sa barangay nga may plakang SG-4466.

Matud pa ni Diano nga ang duha nagdagan nga pulos paatubang sa dakbayan sa Sugbo dihang pag-abot sa nahisgutang lugar kalit nga miliko si Rabaya sa wala ug mibangga sa motorsiklo ni Bucao hinungdan nga silang duha nangalagpot ug pulos mitugpa sa sementadong karsada.

Gidala ang duha sa tambalanan apan si Rabaya nakabsan sa kinabuhi sulod sa Vicente Sotto Memorial Center sa dakbayan sa Sugbo niadtong Lunes sa kaadlawon, samtang si Bucao kinsa nasugamak sa mga bun-og, mga samad ug piang sa lawas nagpaalim pa sulod sa usa ka pribadong tambalanan sa dakbayan sa Sugbo gihapon.

Apan matud pa ni Recamara nga  ang sipyat sa hepe sa traffic division ug sa imbestigador niini mao ang kapakyas nila pagtala sa detalye sa maong hitabo sa ilang blotter. Midugang siya nga gawas sa ngalan ni Bucao ug ni Rabaya, wala nay laing asoy ang buhatan sa trapiko naunsang pagkaunsaa nganong nadisgrasya ang mga hingtungdan.

Maayo nalang kay ang kapolisan nakakuha og detalye ug maoy gipatik sa ilang blotter, matud pa ni Recamara  - BANAT NEWS