60 ka OFW gitabangan sa PESO

CEBU, Philippines - Mokabat sa 60 ka mga nawad-an og trabahong mga Overseas Filipino Workers (OFW) ang natabangan pinaagi sa Public Employment Service Office (PESO) nga gipatuman ni Governor Gwendolyn Garcia.

Mao kini gibutyag ni Dr. Mathea Baguia, pangulo sa PESO ngadto sa Sugbo TV newsteam kalabot sa mga kalamboan sa mga programa nga may labot sa panarbaho.

 Matud pa ni Baguia nga sa matag overseas job fair nga ipahigayon sa Kapitolyo kasagaran tag 20 ka mga OFW ang magpakitabang kanila.

Gani matud pa niya nga kasagaran sa mga OFW nga nawad-an og trabaho sa gawas sa nasud gusto gyud nga makabalik dayon sila sa mga nasud nga ilang gigikanan nga nagkagubot ug maoy hinungdan nga gipapauli sila nganhi sa Pilipinas.

Matud pa ni Baguia nga kadtong uban nga nakahipos og ubay-ubay nga kuwarta misalmot sa pagnegosyo, samtang ang uban nga walay hilig sa negosyo misalmot sa mga seminar alang sa nagkalainlaing matang sa panginabuhi.

Apan matud pa ni Baguia nga dili sila pasagdan sa Kapitolyo basta mangayo lang sila og tabang kang Gobernador Garcia, tungod kay andam kaayo ang gobernadora sa pagsuporta kanila.

Ang Kapitolyo mogahin og lamesa alang sa mga  OFW matag ipahigayong may job fair aron nga katabangan dayon sila sa ilang panginahanglan. (BANATNEWS)