Benepisyo sa contract workers ipahatag - DOLE

CEBU, Philippines - Matagamtaman na unya sa mga contractual employees ang susamang mga benepisyo sa mga regular nga trabahante human gipatuman sa Department of Labor and Employment ang usa ka ordinansa nga nagmando niini ngadto sa mga employers ug mga kompanya. Sa miaging semana gipagawas ni Labor and Employment Secretary Rosalinda Dimapilis-Baldoz ang Department Order No. 18-A, Series of 2011 kon “Rules Implementing Articles 106 to 109 of the Labor Code, As Amended”.

Mipasabot si DOLE-7 Regional Director Atty. Exequel Sarcaoga sa diha nga nahinabi sa Banat News nga ang mga contractual ug subcontractual nga mga trabahante may katungod nga makadawat og susamang benepisyo sa mga regular nga kawani.

Matud pa ni Sarcaoga nga tungod sa mga contractualization adunay mga trabahanteng naabusahan sa ilang mga amo sama sa kakuwang sa sweldo ug mga benepisyo dili pareho sa mga regular nga trabahante. Butyag usab ni Sarcaoga nga ang mga employer nga mipatuman sa lima ngadto sa unom ka buwang kontrata dili gyud mahimong i-renew sa lain na usab nga kontrata.

“Repeated hiring of workers for a five to six months employment contract under the same employer or even under a Service Agreement of the same duration; or under a service contract or agreement of a principal with the same or different contractor or subcontractor, is prohibited in Section 7.A.(7) of the D.O. as this is a violation of Article 280 of the Labor Code,” sumala pa ni Sarcaoga kabahin sa ordinansa nga gipatuman ni Baldoz.

Midugang usab si Sarcaoga nga gawas sa regular nga sweldo, kinahanglang adunay holiday pay, overtime pay, 13th month pay ug uban pang benepisyo gawas sa daan nang benepisyo nga gimandong ipahatag sa mga kompanya sa tanan niining trabahante sama sa health benefits susama nalang sa Philhealth, SSS benefits ug Pag-ibig. “New provision that entitles contractor’s employees to retirement benefits under the SSS or retirement plans of the contractor, if there is any,” tipik sa ordinansa.

Gipahimangnoan ni Sarcaoga ang mga employers nga padayong nagpasweldo lang og wala makaabot sa minimum wage ilabi na niadtong mga kapin lang og P100 ang inadlaw nga pasweldo sa ilang mga trabahante nga masilotan sila ilawom sa Labor Code.

Nanawagan si Sarcaoga sa mga trabahante kun nakasinati sila susama niining pag-abuso sa ilang katungod isip mga trabahante sa pagsumbong sa ilang buhatan aron maleksyon ug mandoan ang mga employers sa pagbayad sa hustong suhulan ug paghatag sa hustong benepisyo. Si Baldoz sa iyang pamahayag nagkanayon nga ang maong ordinansa “ will promote employment and encourage full compliance with minimum wages and general labor standards, including safe and healthful conditions of work, security of tenure, and self-organization and collective bargaining.” (BANATNEWS)