Donasyon nadawat sa CCMC

CEBU, Philippines - Ang hepe sa Cebu City Medical Center (CCMC) nga si Dr. Gloria Duterte nagpasalamat sa mga pribadong sektor nga midonar og mga kasangkapan sa CCMC.

Human sa mga sangkap sa tambalanan nga gipadala nganhi isip hatag gikan sa duha ka tambalanan sa Japan nga mobalor P8 milyones sa miaging buwan, lain na usab nga hinabang ang bag-ohay lang nga nadawat sa CCMC gikan sa mga pribadong indibidwal. Nagkanayon si Duterte nga nadawat nila kagahapon ang mga kahimanang medikal nga mobalor sa P800,000 nga gikan sa mga sakop sa Batch ’71 sa Colegio de la Immaculada Concepcion School.

 Dugang pa ni Duterte nga maisip kini nga sayo nga pinaskohan nga ilang nadawat ug kining tanan adto mahipunta sa mga kabos.

Ang maong mga kahimanan naglakip sa mga cardia monitor, wheelchair, mga kahimanan sa pagsuta sa blood pressure ug uban pa.  - BANAT NEWS