Mga driver sa Talisay moprotesta karon

CEBU, Philippines - Ang mga drayber sa traysikol sa dakbayan sa Talisay nangayo og suporta kang Konsehal Val Ylanan sa ilang protestang himuon karong adlawa (Lunes).

Si Ylanan nga nahinabi sa Banat News mibutyag nga ang mga opisyal sa kapunongan sa traysikol usa na niini si Mario Minyamen, presidente sa Pook-Biasong nga rota maoy miduol kaniya kagahapon sa buntag ug mihangyo nga suportahan sila sa ilang giplanong lakang karong adlawa. Matud ni Ylanan nga ang mga drayber sa traysikol magsugod sa ilang protesta sa alas 7:30 sa buntag pinaagi sa pagpanon ngadto sa city hall aron hangyoon si Mayor Socrates Fernandez nga buksan sa pag-usab ang kanhi terminal sa mga traysikol sa Tabunok.

Apan kung dili motugot ang mayor laing hangyo usab ang ilang ipaabot nga mao ang paghatag kanila og pipila ka oras nga makapundo sa ilawom sa flyover sa Tabunok.

Si Ylanan kinsa ubos sa landong sa oposisyon mipasabot nga kung protesta ang buhaton sa mga drayber sa traysikol pinaagi sa paglusad og strike dili siya mosuporta niini tungod kay maapektohan niini ang mga sumasakay apan kung ang tumong sa mga drayber hangyo lang ngadto sa mayor suportahan niya kini.

Sayo niini si Ylanan mipasar og resolusyon sa konseho sa siyudad nga nag-awhag sa temporaryong pagbukas sa kanhi terminal sa traysikol sa Tabunok apan gibasura kini sa konseho tungod kay ang siyudad aduna nay ordinansa bahin sa pagsirado sa kanhi terminal.

Sa milabay’ng buwan ang Task Force Alpha sa Land Transportation Office (LTO) milusad og operasyon batok sa mga traysikol nga nagpundo ilawom sa flyover tungod kay nakahatag kini og kahuot sa trapiko sa maong lugar.  - BANAT NEWS