Panginabuhian sa urban poor gitanyag

CEBU, Philippines - Mikabat ngadto sa 3,000 ka mga sakop sa urban poor sa dakbayan sa Talisay ang misalmot sa pagsaulog sa Urban Poor Solidarity Week (UPSW) diin gibuksan niadtong Biyernes sa hapon.

Ang pagbukas sa kasaulogan gisugdan sa usa ka Santos nga Misa nga gipahigayon diha sa Santo Niño Parish sa barangay Mohon.

Si Ester Bas, presidente sa Federation of Talisay City Urban Dwellers Association (FETCUDA) mibutyag nga duna silay mga kalihukang ipahigayon sa pagsaulog sa UPSW sa tibuok semana nga salmotan sa mga miyembro diin usa sa mga kalihukan mao ang livelihood training.

Matud ni Bas nga tumong sa iyang administrasyon mao ang paghatag og livelihood project ngadto sa tanang organisasyon sa urban poor sa Talisay aron ang mga miyembro makabayad sa ilang binuwan nga balayranan sa lote nga gitarukan sa ilang mga balay.

“Ako karong gipaningkamutan nga tagsa-tagsa ka mga organization naay livelihood aron makadata sila sa yuta,” ni Bas pa.

Si Bas kinsa kawani usab sa City Housing Office, mibutyag nga bisan og barato na kaayo ang binuwan nga balayranan duna gihapoy mga housing beneficiaries ang naglisod pagbayad tungod kay wala silay mga income.

Matud usab ni Bas nga nanghinaot siya nga ang mga seminar ug training sa livelihood sama sa food processing nga gipahigayon sa pederasyon makatabang sa ilang mga miyembro sa pagsulbad sa problema.

Alang sa pagsugod sa panginabuhi sa ilang mga miyembro ang FETCUDA gikatakdang mobukas pag-usab sa ilang refilling stations diha sa barangay Poblacion diin gamiton nila nga puhonan ang P500 mil nga pundo nga gihinabang ni Kongresista Eduardo Gullas alang sa pederasyon.

Sa laing bahin, si Bas nagkanayon nga gisentro niya karon nga modaghan ang mga housing beneficiaries ubos sa iyang pamunoan.

Gibutyag niya nga sa pagkakaron 35 porsyento lang sa 9,000 nga registered urban poor ang nahatagan og relocation site sa siyudad.

Hinuon niadtong Biyernes laing 200 ka mga miyembro ang nadugang nga mga beneficiary.

Sa laing bahin usab, si Konsehal Dennis Basillote, chairman sa committee on Urban Poor nagkanayon nga sa sunod tuig ang konseho sa siyudad mogahin og P10 milyones nga budget alang sa pagpamalit og lote nga himuong relocation site sa mga kabus nga Talisaynon.  (BANAT NEWS)