Giluba og pinuti sa amahan kritikal

CEBU, Philippines - Kritikal ang kahimtang sa usa ka ulitawo human kini dunggaba og pinuti sa iyang amahan samtang natulog sa ilang balay didto sa bukirang bahin sa Sitio Ulbohan, barangay Bonbon lungsod sa Aloguinsan   sa miaging gabii.

Ang biktima mao si Ramano Bayadog, 48, ulitawo, nagpuyo sa maong lugar tipon sa iyang mga ginikanan.

Samtang ang suspek mao ang iyang kaugalingong amahan nga si Monico Bayadog, 76, nga usa ka mag-uuma.

Si PO1 Rodney Lebumfacel sa Aloguinsan Police Station mibutyag sa Banat News nga sa sayo pa nagkalalis ang biktima ug ang suspek gumikan sa pagsupak sa biktima sa plano sa suspek nga ibaligya niini ang iyang motorsiklo og P10 mil.  

Apan nianang pagka gabii samtang nahinanok sa pagkatulog ang biktima, wala kini kalibotan nga gikamang siya sa nagdumot kaniyang amahan nga nagdala og pinuti ug way daghang estorya gihansak sa dughan sa biktima.

Misampak ang pinuti sa dughan sa biktima apan wa kini matiwas sa pagpatay kay naabtan sa laing anak sa suspek nga maoy nakasanta sa giyawaan nilang   amahan.

Nag-agas ang daghang dugo nga midagan ang biktima gawas sa ilang balay ug nakaabot nga buhi sa Pinamungahan District Hospital apan dali kining gihatod sa tambalanan sa dakbayan sa Sugbo.

Samtang ang suspek mikagulkol dayon sa prisohan human kini hidakpi sa kapolisan. (BANAT NEWS)