Motor midasmag sa koral 1 patay 1 angol

CEBU, Philippines - Patay ang usa ka kahera samtang kritikal usab ang iyang hinigugma human modasmag sa pader sa gasolinahan ang motorsiklo nga ilang gisakyan didto sa highway sa Poblacion Ward-3 sa lungsod sa Minglanilla sa miaging kaadlawon.

Ang namatay mao si Angela Alibio, 25, dalaga, nga taga sitio Maracas, barangay Lahug, dakbayan sa Sugbo ug cashier sa City Hardware nga nahimutang sa barangay Bulacao, siyudad sa Sugbo, samtang ang anaa sa talandugong kahimtang mao ang iyang uyab nga Gilbert Tapic Sasan, 25, ulitawo, nga taga barangay Tuyan, siyudad sa Naga ug merchandiser usab sa City Hardware.

Si PO1 Evie Espina sa Minglanilla Police Station mibutyag sa Banat News nga ang managhigugmaay paingon sa siyudad sa Naga niadtong tungora sakay sa motor nga gimaneho ni Tapic.

Apan pag-abot nila sa maong lugar nawad-an sa preno ang motorsiklo ni Sasan ug mitipas kini sa tuong bahin ug didto midasmag sa puthaw nga railing sa daplin sa karsada dayon milahos sa sementadong koral sa Phoenix Gas station.

Nangalagpot ang duha ug mitugpa sila nga pulos napantok ang mga ulo sa sementadong koral.

Ang mga tawo nga nakasaksi maoy daling mihatud kanila ngadto sa Minglanilla District Hospital diin gideklarar nga dead on arrival si Alivio.

Samtang si Sasan gibalhin usab dayon ngadto sa tambalanan sa dakbayan sa Sugbo gumikan sa katalandugon sa kahimtang niini.

Gidudahan nga nakainom si Tapic samtang nagmaneho sa motorsiklo   nga maoy nakaingon sa disgrasya. (BANAT NEWS)