CEBU, Philippines - Kritikal ang kahimtang sa usa ka 35 anyos nga ginang human kini pusila sa wala hiilhing kriminal samtang nanglaba gawas sa ilang balay didto sa Sitio Guimbal, barangay Kanamucan lungsod sa Compostela sa miaging adlaw.
Ang biktima mao si Analie Cuesta, 35, dalaga nga pinaangkan.
Si PO1 Ralph Bracero sa Compostela Police Station mibutyag sa Banat News nga ang biktima nagsag-ob og tubig sa wala pa kini manglaba.
Apan sa dihang naglaba na siya, ang wala hiilhing kriminal miduol niini ug gipusil ang iyang nawong ug ang iyang walang paa dayong sibat.
Ang miresponding mga polis mao nay mihatod sa biktima ngadto sa Danao City District Hospital apan gibalhin kini ngadto sa Vicente Sotto Memorial Medical Center (VSMMC) sa dakbayan sa Sugbo.
Padayong gisuta sa kapolisan ang motibo sa krimen ug ang pagpangita sa kriminal.( (BANAT NEWS)