CEBU, Philippines - Nagtingkagol sa karsel ang usa ka estudyanteng Iranian human kini nakaangol og mga tawo dihang gidaro sa iyang sakyanan ang tulo ka sakyanan pasado alas-3 sa kaadlawon kagahapon sa Governor Cuenco Avenue Barangay Banilad ning dakbayan.
Ang mga biktima nailhan nga silang Nilo Aragon, 37, molupyo sa syudad sa Mandaue, Magdaleno Tulin Jr., molupyo sa barangay Talamban, Christopher Semilla, 34, molupyo sa barangay Bacayan, pulos mga taxi driver.
Ang suspetsado nailhan sa ngalan nga Kaveh Saeedishakileh, 28, tinun-an sa University of San Carlos ug kasamtangang nagpuyo sa barangay Talamban ning dakbayan.
Sa imbestigasyon sa Cebu City Traffic Division, nasayran nga ang suspetsado nagmaneho sa iyang Mitsubishi Galant nga adunay plakang ZSZ-555 uban sa ig-agaw nga nailhan sa ngalan nga Mehdi.
Sa dihang naabot sila sa nahisgutang lugar kalit kini nga midaro sa tulo ka mga taxi nga diha usab sa maong lugar tungod sa kakusog sa pagbangga nakaangkon ang suspetsado og mga samad sa kalawasan.
Samtang ang mga taxi driver nakaangkon usab og mga minor injuries apan ang ilang sakyanan maoy wala na mahitsura.
Ang suspetsado gidala sa kapolisan sa Cebu City Medical Center kini aron ipaubos sa liquor test ug giingong nagpositibo kini.
Ang ig-agaw sa suspetsado nga si Mehdi misuway og areglo sa mga biktima aron buhian ang suspetsado apan si Chief Inspector Aureo Sanchez sa traffic division mibutyag nga dili nila mapagawas ang suspetsado kun walay formal settlement nga mahitabo.
Nasagmuyo usab si Mehdi sa kapolisan tungod kay gipaslak gyud si Saeedishakileh sa karsel tungod kay nahadlok siya nga atakihon kini sa sakit ug may dautang mahitabo sa ig-agaw diha sa sulod. Tungod kay walay opisina kagahapon ug ugma pa sa buntag (Lunes) mabuhian ang suspetsado kun ugaling makig-areglo ang mga biktima.
Ang suspetsado nga gipangutana sa mga tigbalita kagahapon nangangkon nga wala siya masayod sa nahitabo kaniya.
Ang kapolisan mopasaka og kasong Simple Imprudence Causing Damage to Property ug kalapasan sa Republic Act 4336 kon Driving Under the Influence of Liquor. (BANAT NEWS)