CEBU, Philippines - Mikabat sa P1.5 milyones ang kantidad sa mga bala ug piyesa sa armas nga nasakmit sa mga otoridad sa Bureau of Customs (BOC) sa miaging adlaw sulod sa usa ka 40-footer van matud pa ni Cebu Customs District Collector Ronnie Silvestre kagahapon.
Ang maong kargamento nga gikan sa Estados Unidos giimbentaryo kini sa mga tinugyanan sa BOC sa pagpanguna ni Cebu Customs Police District Commander nga si Major Camilo Casculan Jr.
Matud pa ni Silvestre nga mikabat lamang sa P1.5 milyones ang kantidad sa maong mga bala ug mga piyesa sa armas lahi sa unang nasakmit nila nga mikantidad og P3.5 milyones.
Matud pa ni Silvestre ang ang unang container van nga iya ni Renato Ramos giluwatan na og Warrant of Seizure and Detention (WSD) ug ila nang giimbargo pabor na sa goberno.
Gumikan niini andam na ang maong mga ebidensiya nga ipaubos sa usa ka subasta, apan ila unang lihokon ang proseso sa paghimo niini.
Samtang kining ikaduhang nasakmit nila nga mga bala ug mga piyesa sa armas nga gi-consign sa D. Golden House Trading Company moagi pa og prosesong legal sa dili pa nila kini isubasta ngadto sa publiko.
Ang unang lakang nga himoon sa mga tinugyanan sa BOC mao ang paghatag og higayon sa tag-iya ug broker sa maong kargamento nga mopakita og mga kamatuoran ngadto sa ilang buhatan sa dili pa nila kini hukman.
Gipasalig ni Silvestre nga adunay mga tawo nga mapasakaan og kaso gumikan sa illegal nga pagpalusot sa maong mga kargamento. - BANAT NEWS