CEBU, Philippines - Gikabalak-an nga aduna nay tinagotago nga pagpamaligya og pabuto sa dakbayan sa Mandaue kun hingpit nga kaaprobahan sa konseho ang total ban sa pagpamaligya niini.
Kini ang reaksiyon sa pipila ka mga manindahay sa merkado publiko sa maong dakbayan kinsa nagplano unta sa pagpamaligya og pabuto sa pagpahimulos sa kahigayonan nga kusog ang halin niining panahon sa pagsaulog sa Pasko.
Si Mandaue City Fire Marshall Rigelio Bongabong miingon nga iyang gipadala ang sulat ngadto sa konseho sa maong dakbayan nga mopalabang og ordinansa nga hingpit nang magdili sa pagpamaligya og pabuto sa maong dakbayan niining panahon sa pagsaulog sa Pasko ug Bag-ong Tuig.
Gipasabot ni Fire Chief Inspector Bongabong nga wala’y luna nga gipanag-iya sa kagamhanan nga mahimong ideklarar nga firecracker zone area.
Ang firecracker zone area kinahanglang gipanag-iya sa gobiyerno ug nahimutang kini 50 metros gikan sa kabalayan ug mga establisamento.
Gipasabot ni Bongabong nga kaniadto ang sagad nga lugar nga maoy edeklarar nga firecracker zone area mao ang reclamation apan kun subayon ang lagda nga gilatid dili kini mahimo kay gawas nga gipanag-iya sa pribado anaa usab kini mahimutang duol sa dagkong mga establisamnento.
Si Bongabong miingon nga bisan kun milabay na ang mga tuig niadtong 2009 nga nahitabo ang pag-ulbo sa mokabat 50 kapin ka mga baligyaanan og pabuto sa reclamation area sa dakbayan sa Mandaue apan lab-as pa kaayo kini sa panumdoman sa kabanay sa mga biktima ang mao nilang kasinatian.
Si Bongabong miingon kun mauyonan sa konseho ang total ban sa pagpamaligya og pabuto sa dakbayan mahimo nilang sakmiton ang molapas niini. - BANAT NEWS