Vidal andam motabang ni Palma sa CBCP

CEBU, Philippines - Andam si Cebu Archbishop Emeritus Cardinal Vidal nga mogiya bisan unsang orasa nga kinahanglanon ni Cebu Archbishop Jose Palma kinsa miasumir na sa pwesto isip bag-ong presidente sa Catholic Bishop Conference of the Philippines (CBCP).

Si Palma opisyal na nga milingkod sa iyang posisyon isip bag-ong CBCP president niadtong Miyerkules sa usa ka formal turnover didto sa CBCP headquarters sa Intramuros, Manila.

Una nang gisangyaw atol sa CBCP bi-annual plenary meeting didto sa Pope Pius XII Center sa Manila niadtong Hulyo 9 nga si Palma maoy molingkod isip pangulo sa CBCP.

Gihulipan ni Palma si Tandag Bishop Nereo Odchimar kinsa nakahukom nga dili na magpapili pag-usab pagka presidente sa CBCP.

Si Vidal kinsa nagsaulog sa iyang ika-40 episcopal anniversary didto sa Cebu Metropolitan Cathedral, nagkanayon nga dili mawala ang iyang presensya ug anaa ra siya kanunay kun pangayuon ni Palma ang iyang tabang ilabi na sa mga nalambigit nga isyu karon sa simbahan.

Ang 61-anyos nga si Palma maoy nahimong tagasunod ni Vidal dihang giinstalar siya isip bag-ong Arsobispo sa Sugbo niadtong Enero 13 didto sa Cebu Metropolitan Cathedral.

Uban ni Palma nga milingkod sa posisyon sa CBCP mao si Lingayen-Dagupan Archbishop Socrates Villegas kinsa maoy napiling bag-ong bise-presidente, samtang ang Sugbuanon ug Bishop sa Dumaguete nga si Bishop John Du maoy treasurer ug si Msgr. Joselito Asis molingkod isip secretary general.  - BANAT NEWS