VECO gireklamo sa negosyante

CEBU, Philippines - Usa ka magpapatigayon ang mipasaka og kasong sibil batok sa Visayas Electric Company (VECO) ug sa upat niini ka mga empleyado.

Si Philip Abellana molupyo sa Salinas Drive, sa barangay Lahug miduso og kaso ug nangayo og bayad danyos ug writ of preliminary injunction batok sa VECO ug sa upat ka mga empleyado niini.

Gawas niini, iya usab nga gihangyo ang korte nga mandoan ang VECO nga ipabalik ang kuryente sa iyang tindahan.

Ang mga VECO employees mao silang Marvin Dudilla, Roy Edward Mission, Domingo Vergara, Jr. ug Rey Francisco.

Si Abellana nga nanag-iya og gun store sa maong lugar mireklamong dili makatarunganon ang pagputol sa ilang kuryente sa VECO nga gibase lang sa suspetsang illegal ang tinubdan sa iyang kuryente.

 “ The disconnection of power supply on his establishment was unjustified since the VECO merely cited suspicion of his alleged illegal use of electricity to oblige him to pay the differential billing amounting to P79,586.77,” matud pa sa affidavit ni Abellana

Midugang kini nakadawat siya og suwat gikan sa VECO niadtong buwan sa Oktubre 26 ning tuiga nga nagsaysay sa differential billing sa iyang establisamento sukad niadtong buwan sa Disyembre tuig 2008 hangtod na sa buwan sa Septiyembre ning tuiga nga nagkantidad og P79,586.77.

“The VECO gave me one business day from receipt to settle the differential billing,” pasabot pa ni Abellana

Samtang ang VECO sa ilang suwat nga gipadala ngadto kang Abellana mibutyag nga ang differential billing mitumaw tungod sa anti-pilferage team nga nakadiskubre sa ‘pilferage’ o ilegal nga koneksyon sa kuryente sa establisamento ni Abellana

“A# 10 twisted wire and #8 stranded wire was directly tapped at Veco’s secondary line going to the commercial building. The foregoing condition prevented us from registering and billing the actual and full usage of electricity,” tipik sa sulat sa VECO ngadto kang Abellana.

Ang VECO nakakita og unom ka kalapasan nga gihimo ni Abellana kini naglakip sa pagtangtang sa meter data, tampered meter, installation sa jumper, illegal extension, direct connection/no meter ug by-pass meter. Nasayran nga giputlan og kuryente si Abellana niadtong buwan sa Nobiyembre 21 ning tuiga apan gikwestyon kini ni Abellana.

Gikwestyon ni Abellana kun unsay basihan sa VECO pagputol sa kuryenti sa iyang establisemento nga nakalapas man ang VECO sa “constitutional guarantees of a fair hearing before an impartial court.”

Midugang si Abellana nga wala siya’y palta sa pagbayad sa iyang bayranan sa kuryente ug gani wala usab siya makalapas sa mga nahisgutang kalapasan nga gipasangil sa VECO.

“I was shocked to learn about the allegations of VECO since I never done anything wrong and I was unaware of the power firm’s supposed inspection in my company,” pasabot pa ni Abellana.

Butyag usab ni Abellana nga ang gipahigayong inspection nga gihimo sa VECO anti-pilferage team usa lang ka pagpanagat nga klase sa imbestigasyon aron lang gyud siya mapasakaan og kaso.

Dugang usab si Abellana nga ang VECO nakalapas usab sa probisyon sa Constitution tungod kay wala siya hatagi og oportunidad nga makadepensa sa iyang kaugalingon kalabot sa mga alegasyon nga gibato batok kaniya.  - BANAT NEWS