3 gipamatay sa Lapulapu

CEBU, Philippines - Tulo ang patay sa managlahing takna ug dapit nga pagpamusil sa dakbayan sa Lapulapu sa milabay’ng gabii.

Ang unang pagpamusil nahitabo alas-6 pasado ang takna sa gabii sa sitio Agudo, barangay Pajac, dakbayan sa Lapulapu ug ang biktima giila nga mao si Felix Tabigue, 37, adunay kapuyo nga lumad nga taga Buenavista, Bohol nga nagtrabaho isip factory worker ug kasamtangang nagpuyo sa maong dapit.

Si PO2 Winston Ybañez sa Homicide Section sa kapolisan sa maong dakbayan miingon nga kuyog sa biktima ang kapuyo ug anak nga 6-anyos nga naglakaw gikan nga nagpalit og sud-an sa usa ka tindahan.

Apan sa ilang paglakaw pauli gisundan kini sa duha ka wala mailhing lalaking nagmotorsiklo ug ang angkas kalit lang mipusil makadaghan sa biktima dayong pabulhot palayo.

Ang biktima dali nga gidala sa Lapulapu City District Hospital apan gideklarar kini sa mga doktor nga dead on arrival.

Ang ikaduhang pagpamusil nahitabo sa barangay Pajo, dakbayan sa Lapulapu alas-9 pasado ang takna sa miaging gabii ug ang biktima mao si Rico Cajes Napalla, 31, usa ka tempura vendor ug nagpuyo sa maong dapit.

Si Ybañez miingon nga gipangita sa biktima ang 7-anyos niining anak ug dihang iyang napalgan sa usa ka piryahan sa maong lugar gidala niya kini pauli sa ilang panimalay.

Apan kalit lang mitumaw ang duha ka wala hiilhing lalaki nga nagsakay og motorsiklo ug kalit gipusil sa makadaghang higayon ang biktima kinsa namatay diha-diha tungod sa mga igo sa bala diha sa iyang ulo ug kalawasan.

Ang ikatulong pagpamusil nahitabo alas-2 pasado na ang takna sa kaadlawon ug ang biktima mao ang usa ka gwardiyang nagbantay sa trabahoan niini nga giilang si Ereneo Anone, 34.

Si Anone taga lungsod sa Badian ug bag-ohay pang nag off duty sa gibantayang Grand Cebu Pacific Oil Depot sa Seaside, barangay Pajo sa mao gihapong dakbayan.

Si Ybañez miingon nga paingon na pauli ang biktima gikan sa iyang duty dihang kalit gipusil samtang naglakaw sa ngitngit nga bahin dili layo sa iyang gitrabahoan.

Dugang pa ni Ybañez nga ang relibong gwardiya ni Anone nga si Denver Pino miingon nga ang mga molupyo na maoy mipahibalo kaniya sa nahitabo sa iyang kauban nga ilang naagiang nagbuy-od na daplin sa dalan. Si Pino mitug-an sa kapolisan nga nakabati siya og nagsunod nga buto apan wala lamang niya kini panumbalinga sa pagtuong buto ra sa rebentador.

Ang hepe sa Homicide Section nga si Sr. Insp. Zenaido Pastorfide mibutyag nga padayon pa ang ilang imbestigasyon sa maong nagsunod nga pagpamusil.

Usa sa problema nga nasinati sa iyang mga imbestigador mao ang kawalay kooperasyon sa mga tawo sa nanghitaboan.

Si Lapulapu City Mayor Paz Radaza sa iyang bahin nabalaka usab sa maong krimen gumikan kay makaapekto kini sa turismo sa dakbayan kung dili kini masumpo ug madakop ang mga responsable niini.

Matud pa ni Radaza dili lamang kini maoy unang hitabo nga nagsunod ang mga kaso sa pagpatay sa maong dakbayan sa milabay’ng mga bulan apan hangtod karon wala pay kasulbaran.

Gimando ni Radaza kang Lapulapu City Police Office Director Sr. Supt. Anthony Obenza nga sulbaron sa daling panahon ug sumpuon ang ‘riding tandem’(angkasay) nga mga kriminal.  - BANAT NEWS