Namutol og sanga nakuryentihan

CEBU, Philippines - Patay ang usa ka mag-uuma human kini aksidenteng nakuryentihan sa mainline sa Cebu Electric Cooperative (CEBECO) samtang namutol sa mga sanga sa kahoy didto sa barangay Owak sa lungsod sa Asturias niadtong Miyerkules sa alas 2:50 sa hapon.

Giila ang biktima mao si Celso Pacquiao Pedrosa, 48, nagpuyo sa maong lugar ug usa ka mag-uuma kinsa matud pang PO2 Cesar Climaco sa Banat News misaka sa puno-an sa kahoy nga Germilina dili layo sa ilang balay aron pamutlon ang mga sanga nga misambilay sa linya sa kuryente.

Apan samtang namutol giingong midapat ang linya sa kuryente sa sangang iyang giputol nga nabasa na sa tagok nga aksidente sad niyang nakapyutan hinungdan nga kini nakuryentihan.

Maayong pagkapaso sa kalawasan ug nahagbong ug wala nay panimuot nga gidala sa mga silingan sa Balamban District Hospital apan gideklarar nga dead on arrival. (BANATNEWS)