MCIA ibutang sa Caubian island?

CEBU, Philippines - Nabuhi pagbalik sa hunahuna ni Lapulapu City Mayor Paz Radaza ang iyang lakang sa pagbutang og laing tugpahanan sa isla sa Caubian Island nga sakop sa dakbayan sa Lapulapu.

Kini human mogawas ang mga balitang adunay higanteng negosyante sa nasud nga tag-iya sa Shoe Mart o SM Malls nga si Henry Sy nga paliton ang luna sa Mactan Cebu International Airport sa dakbayan sa Lapulapu.

Matud pa ni Radaza iya unang hunahunaon og maayo kung angayan ba siya mouyon sa maong tinguha o iyang babagan ug kinahanglang aduna pa silay himuong lawom nga pagtuon kabahin niini.

Sumala pa ni Radaza bisan pa nga miabot na sa P1.4 bilyones ang utang sa MCIA ngadto sa lokal nga kagamhanan sa dakbayan sa Lapulapu nga hangtod karon wala pa mabayri angayan nga mahibalo ang publiko sa mga "advantage ug disadvantages" kung mawagtang ang maong tugpahanan.

Gumikan niini nabanhaw ang iyang nahunahunaan nga angayang ibalhin ngadto sa isla sa Caubian diin luag ang maong dapit ug duol usab kini sa lalawigan sa Bohol. Matud pa ni Radaza mas nindot ang dapit sa Caubian kung itandi sa lungsod sa Cordova nga kabalhinan sa bag-ong tugpahanan.

Kahinumduman nga si Henry T. Sy tag-iya sa SM Prime Holdings Inc. mipadala Og suwat ngadto ni Nigel Paul Villarete ang MCIAA Gen. Manager diin mipadangat sa ilang tinguha sa pagpalit sa luna sa MCIA gumikan sa taho nga ibalhin sa Cordova ang bag-ong tugpahanan ug mipasalig nga daghang trabaho mahatag niini sa mga Oponganons.

Samtang gikahibulong ni Cebu City Mayor Michael Rama ang maong gipakitang interes ni South District representative Tomas Osmeña sa maong isyu nga dili man kini hurisdiksyon sa naulahi.

Matud ni Rama nga kinahanglang adunay konsultasyong himuon ilabi na sa mga negosyanteng maapektahan kung ibalhin sa laing lugar ang MCIA. (BANATNEWS)