Kasadya sa Sugbo gibuksan

CEBU, Philippines - Buksan na karong Disyembre 12 ang Kasadya sa SRP nga himuong venue sa nagkadaiyang mga kalingawan matag gabii nga molungtad na hangtud sa Enero sunod tuig ini og kahuman sa Sinulog.

Sumala pa ni City Market Administrator Raquel Arce nga mao usab kini ang usa sa pamaagi nga maengganyo ang publiko paghunong sa SRP ug mahatagan usab og higayon ang mga negosyanteng Sugbuanon nga namaligya og pabuto nga mahalinan.

“Sa una man gud, mga fire crackers ra ang gipamaligya diha sa SRP, busa karon, mas sadya na siya nga duna nama’y mga baligya nga pagkaon ug uban pa,” suma pa ni Arce.

 Butangan usab ang maong dapit og Carnival aron seguradong malingaw ang kadaghanan ug dunay mga stage performers nga molingaw sa mga tawo matag gabii. Alang sa kasayuran sa publiko, kadtong walay kaugalingong sakyanan apan gustong moadto sa SRP mahimo silang mosakay sa giandam nga mga bus diha sa City Hall ingon man usab boundary sa Talisay City ug dakbayan sa Sugbo nga maoy mohatud ug mokuha sa mga tawo.

Samtang si Mayor Michael Rama nagkanayon nga gituyo ang maong programa aron mas sadya ang Pasko sa mga Sugbuanon sanglit daghan sila og kapilian kung asa sila gusto nga manuroy.

Sa laing bahin, pormal   nga gibuksan kagabii ang tinuig nga kalihukan sa kagamhanan sa siyudad sa Sugbo nga mao ang “Pasko sa Sugbo” sa Fuente Osmeña Circle ug ang Kasadya sa Downtown (Colon).

Gipahigayon usab sa maong dapit ang pagpasiga sa dakong Christmas Tree nga gisundan dayon sa fireworks display. (BANATNEWS)