Grupong nangarnap gikasohan

CEBU, Philippines - Gipasaka na sa korte ang kaso batok sa lima ka mga dinakpang gipasanginlang mikawat sa usa ka multicab nga gisuwayan og baligya ngadto sa usa ka polis niadtong milabay’ng semana. Ang Talisay City Prosecutors Office miduso sa kasong carnapping ngadto na sa korte pinaagi ni Prosecutor Benjo Luther Macion human kini nakakita og igong basehan aron maduso ang kaso ngadto na sa korte ug mirekomendar og P180 mil nga piyansa matag usa alang sa ilang temporaryong kagawasan.

Ang mga gipasakaan mao silang Nexson Jumao-as, Christian Dela Cruz, Ralph Ryan Catulong, Rey Cris Gonzaga ug Danilo Capellan.

Samtang ang at large mao usab silang PO2 Arvin Hernandez, Marione Lambojon, ug laing duha nga wala pa mailhi. Si Hernandez kinsa sa nahaunang mga report mihimakak ug nangangkong wala masayod nga kinawat ang multicab gikatakda usab nga imbestigahon sa iyang mga labaw tungod sa kasong administratiba.

Ang magpapatigayong si Felix Enopia, molupyo sa sitio Nonoc Barangay Tabunok syudad sa Talisay maoy mipasaka sa kaso.

Human sa pipila ka adlaw miadto siya sa Camp Sotero Cabahug ug diha na niya kini makit-i sa maong kampo apan lahi na og plate number.

Kini aduna nay plakang KFV-276 imbes GTD-788 maoy iyang nakita diha atubangan sa Regional Crime Laboratory Office. Nasuta nga gisuwayan diay kini pagbaligya sa maong polis diha sa usa sa mga sakop sa PNP Crime Laboratory. (BANATNEWS)