CA mimatuod anchorman sa Bombo sad-an

CEBU, Philippines - Ang Court of Appeals (CA) sa 18th division mipamatuod sa ruling sa lower court nga guilty gayud sa kasong libelo si Epifanio Oscar Jr. ang kanhi anchorman sa Bombo Radyo.

Si Associate Justice Nina Valenzuela nakakita og igong ebidensya nga nagtumbok ni Oscar . nga mipagawas og mga libelusong estorya batok kang Judge Gerardo Gestopa, Jr. usa ka presiding Judge sa Municipal Trial Court sa syudad sa Naga.

Samtang gibasura usab ni Valenzuela ang appeal ni Oscar.

Si Oscar usa ka anchorman sa radio program sa DYMF Radio (Bombo Radyo) nga nag-ulohan og “Bombohanay Big Time” diin gikatahong adunay intensiyon sa paggusbat sa dungog si Gestopa pinaagi sa mga gibuhiang estorya niini sa kahanginan niadtong Septiyembre 4,1998.

Nasuta nga ang pagpakauwaw ni Oscar kang Gestopa pinaagi sa kahanginan nabati gayud mismo sa maong huwes nga kihante.

“The justice of one man will only be severed if this Judge Gerardo Estopa is just allowed to handle this case. Its better that you commit suicide! You’re a big liar, judge.“With this kind of Judge, justice is topsy-turvy. Knows how to invent cases towards filing in court! Questionable judgment (in English version)” tipik sa kasong gisang-at.

Si Gestopa nga maoy gibunalan pag-ayo sa maong komentaryo sa sinumbong nagkanayon nga sukad niadto dili na siya makatulog og tarong magabii tungod sa pagkagusbat sa iyang reputasyon isip huwes ug puwerting uwawa niya ilabi na ang Bombo Radyo sipa ug lanog kaayo nga mabati gayud sa hapit tanang katawhan sa Kabisay-an ug Mindanao.

Unya misamot kini dihang ang iyang brother-in law nga si Teofilo Vasquez nakadungog usab sa maong programa didto sa ilang balay sa dalan Manalili ning dakbayan.

Miingon si Gestopa nga ang pagbalikbalik ni Oscar og palanog sa mga sulting sakit kaayo batok kaniya maoy nakapalusno sa iyang pagkatawo, sumala pa sa huwes nga kihante.

Matud pa ni Gestopa nga daan nang gipasakaan niya og kasong libelo    si Oscar apan napundo kini karon sa Mandaue City Regional Trial Court (RTC) Branch 56 samtang ang ikaduhang kaso nga libelo napasaka usab niya sa RTC Branch 20 ning dakbayan sa Sugbo nga maoy unang nasugdan sa pagpaminaw.

Samtang si Oscar sa iyang bahin midepensa nga on-leave kuno siya niadtong tungora nga nadunggan ni Gestopa ang mga libeloso niyang komentaryo.

Gani ang iyang kauban nga si Ely Carunggay maoy temporaryong midumala sa maong programa sa maong higayon.

Samtang ang station manager sa DYMF Juan Elias Yandug, Jr. ug si Carunggay miuyon usab sa testimoniya ni Oscar.

Matud pa ni Carunggay nga siya maoy senior anchorman sa programang “Sona Libre” apan kay wala man si Oscar sulod sa tulo ka adlaw siya una ang mipuli apan wala kuno siya mobuhi og mga libelosong mga pamahayag batok kang Gestopa.

Apan sa gilagda ni Valenzuela nga “The Supreme Court has time and again ruled that denial, just like alibi, if not substantiated by clear and convincing evidence, is inherently weak, being self-serving negative evidence undeserving of weight in law,” tipik sa iyang desisyon. (BANAT NEWS)