Sotto nangayo'g suporta sa LGU

CEBU, Philippines - Si Senate Majority Floor Leader Vicente Sotto III nangayo og suporta sa mga lokal nga opisyal sa Sugbo alang sa iyang gipasar nga balaodnon nga alang sa pagpausbaw sa bahin sa gitawag nga “sales tax” sa mga local government unit (LGU) sa tibuok nasud.

Si Sotto maoy nangamahan sa Senate Bill No. 42 nga nag-awhag sa pag-amendar sa Akta Republika 7610 kon “Local Government Code of 1991” ilabi na sa Section 15 niini nga mao ang “Sales Tax Payment Allocation” nga nagmando nga ang lugar diin natawo ug nagbase ang usa ka patigayon makadawat og dakung porsiyento kay sa nahimutangan sa mga sanga niini.

Ang mga multi-national nga kompaniya ug dagkung industriya mitukod sa ilang mga patigayon isip principal place of business didto sa National Capital Region isip place of registry.

Apan matud ni Sotto nga ang mga nahimutangan sa mga sangang buhatan niini diin nagdagan ang ilang negosyo sama sa mga pabrika, bodega , ug distribution center anaa sa mga probinsiya sama sa dakbayan sa Sugbo, Mandaue ug Lapu-Lapu.

Gipasabot ni Sotto nga ubos sa kasamtangang balaod ang mga siyudad ug mga munisipalidad diin mahimutang ang mga sanga sa mga industriya makadawat lang og gamay nga bahin   sa buhis itandi sa nahimutangang dapit sa ulohang buhatan sa maong patigayon.

Kining maong sistema maoy buot usbon ni Sotto kay sa pagkakaron ang actual place of business gamay ra man ang pahat niini gikan sa buhis sa maong patigayon ug ang sa principal place of business mao man ang mas dako og gidawat.

Busa alang kang Sotto nga kinahanglang usbon kining maong balaod aron ang actual place of business maoy may dakong pahat kay sa principal place of business, matud niya.

“This is fair as it is the provincial LGU that provide safety and security, maintenance of the road, yet it receives the smaller share while the principal place of business merely houses the air condition offices”, ni Sotto pa.

Si Sotto nagkanayon nga ang Cebu isip sentro sa Visayas region mao unta ang mangulo sa mga provincial LGU sa pag-awhag sa ubang mga magbabalaod sa nasud nga mosuporta sa iyang balaodnon.

“The bill when it becomes a law will surely usher economic boom in the provinces”, dugang pa sa Senador. Sayo pa ang national government ubos sa national budget giingong mopakibra sa Internal Revenue Allotment (IRA) sa mga LGU sa sunod tuig.

Ug tungod niini, si Bokal Sun Shimura miduso og resolusyon nga nag-awhag sa Kongreso sa pagbabag sa maong katuyoan sa nasudnong kagamhanan.

Matud ni Shimura nga kung tibhangan ang IRA sa mga LGU maapektohan ang mga programa ug proyekto niini. (BANAT NEWS)