2 angol sa sunog sa assessor's office

CEBU, Philippines - Duha ka security guard sa Kapitolyo ang naangol dihang miulbo ang sunog sulod sa buhatan sa provincial assessor sa Kapitolyo kagahapon sa alas 2:00 sa hapon.

Ang mga biktima mao sila si Servillano Angcay ug Ronilo Auxterio pulos samdan sa nagkalainlaing bahin sa lawas.

Ang maong mga biktima maoy midali pagsil-ing  sa lawak sa assessor’s office dihang nakita nilang may miulbong aso gikan sa maong buhatan.

Ang hinungdan sa ilang pagkasamad mao ang mga bildo sa fire extinguisher nga nabuak dihang ilang gihapsan og wasay aron magamit nila ang maong kahimanan pagpawong sa kayo.

Hinuon gumikan sa kaabtik sa maong mga guwardiya, wala makakaylap pag-ayo ang kayo ug gani sa paghiabot sa mga bombero milanat lang og usa ka minuto ang ilang pakigkombati sa kayo napaslok dayon kini.

Sumala ni FO3 Ulysses Hermoso sa Cebu City Fire Department nga short electrical circuit ang hinungdan gumikan sa usa ka air conditioning unit nga wala mapawong .

Gibanabana niyang mga P1,000 ang balor sa kadaot sa maong sunog. Wala pa masuta kun kinsay manubag sa maong sunog diin naggumikan sa kadanghag sa mga tawong mibiya sa maong opisina nga wala pagnga ang airconditioning unit niini. (BANAT NEWS)