CEBU, Philippines - Pormal nga giila sa kapolisan sa dakbayan sa Lapulapu ang milabay og dinamita sa mga misalmot sa “underwater photography competition” didto sa Isla sa Olango sa milabay’ng Domingo.
Atol sa usa ka press conference nga gipatawag ni Lapulapu City Police Office Director P/SSupt. Anthony Obenza sa milabay’ng hapon iyang gipaila sa media ang maong suspetsado nga mao si Maximo Sugarol Jr., 34, usa ka mananagat nga taga Punta Engaño sa maong dakbayan.
Nasuta sa kapolisan nga si Sugarol naputlan na og tuong kamot kay nabuthan sa dinamita niadtong tuig 2007.
Pipila ka mga residente sa maong dapit ang mitug-an nga si Sugarol ra maoy nakita nila nga didto sa maong lugar nga gipahigayonan sa maong kompetisyon uban ang 100 ka mga langyaw nga misalmot.
Sa pagsusi sa kapolisan sa balay ni Sugarol, wala na kini didto ug posibleng milayas kini human sa maong hitabo.
Matud pa ni SSupt. Obenza nga kasong kalapasan sa RA 8550 ang ilang ipasaka batok sa suspetsado bisan pa kung kini magtago-tago.
Kahinumdoman nga ang grupo sa mga Tsino nga misalmot sa maong bangga sa pangodak ilawom sa tubig mitaho ngadto sa kapolisan kalabot sa dinamitang gipabuto sa dapit diin nalingaw kaayo ang mga misalmot sa bangga pagkuha og mga matahom nga larawan ilawom sa dagat sa Olango.
Hinoon walay naangol sa maong hitabo, apan si Sugarol nakuhaan og hulagway sa mga langyaw ug maoy gibasehan sa kapolisan sa pag-ila niini. (BANAT NEWS)