Pagbaligya solvents ug rugby sa Mandaue higpitan

CEBU, Philippines - Higpit nang gidili sa dakbayan sa Mandaue ang pagpataka og pamaligya og mga rugby, solvents, sealants ug uban pa kung walay special permit nga gikan sa dakbayan.

Kini maoy tinguha sa naaprubahang ordinansa sa dakbayan sa Mandaue nga gipangamahanan ni Konsehal Jimmy Lumapas.

Si Lumapas miingon nga ang maong ordinansa maoy nakitang solusyon aron makontrol ang pagpamaligya niini ngadto sa kabataang nagumon na sa paghingos niini nga makadaot sa ilang pangisip ug panglawas.

Matud pa ni Lumapas nabutang sa kakuyaw ang panglawas sa usa ka tawo nga mohingos niini.

Lakip sa gilatid sa maong ordinansa nga gidid-an na ang mga tindahan sa pagbaligya niini ilabi na ngadto sa kabataan kung walay mapakitang pagmatuod nga gamiton kini sa tinarong nga butang.

Ang si bisan kinsa nga makahimo og kalapasan sa maong ordinansa mahimong pasakaan og kaso base sa ordinasa.

Sa unang kalapasan may bayran nga multa nga P2,000, P5,000 alang sa ikaduhang kalapasan ug ang pagpatak-op sa tindahan sa ikatulong higayon. (BANAT NEWS)