Payroll money gitulis sa duha

CEBU, Philippines - Nasakiyo ang kapin sa 60 mil pesos nga payroll money sa usa ka rattan factory human gitulis ang kawani nga gikan nag-withdraw sa kwarta gikan sa bangko samtang naglakaw sa dalan sa barangay Guinsay siyudad sa Danao niadtong Martes sa alas 2:45 sa hapon.

Ang biktima mao si Joel Soriano Viagedor, 28, nagpuyo sa barangay Poblacion ug administrador sa I.T. Rattan factory nga nahimutang ra sab sa maong lugar.

Duha ka mga lalaking nagsakay og motor nga nag- angkasay ang gitumbok nga responsable sa pagpanulis ug gikuha ang sweldo sa mga trabahante nga mokantidad og P63,267.72 ingon man ang 275 nga U.S. dolyares.

Matud ni PO1 Faron Avila, desk officer sa Danao City Police Station dihang nahinabi sa Banat News ang biktima naglakaw lang gikan sa bangko balik sa trabahoan dihang gihunongan sa duha ka mga lalaking nag-motor.

Gikatahong gitionan kini og armas dayong deklarar og tulis ug pugsanong gikuha ang iyang gibitbit nga brown envelop nga maoy gisudlan sa kwarta ug pagkahuman daling miikyas ang mga tulisan. Sumala pa nga walay plaka ang Honda Wave nga motorsiklong gisakyan sa mga tulisan.

Ang biktima igo nalang sa pagdangop sa kapulisan aron ipa-blotter ang maong panghitabo. Ang kapulisan padayon pang mihimo og subsob nga follow up operation pag-ila sa mga responsable.(/EIM)(BANAT NEWS)